सर्लाहीका उँखु किसान र सरकारबीच भयो यस्तो सहमति

न्यूज ब्यूरो, काठमान्डौं । विगत १३ दिनदेखि निरन्तर आन्दोलनमा रहेका सर्लाहीका उँखु किसानहरु आज सरकारसँग वार्ता गरको छ ।

यसअघि पनि बसेको बैठकमा मौखिक रुपमा सहमति गर्ने भनेपछि वार्ता विफल भएको थियो भने किसानहरु निरन्तर आन्दोलन गरिरहेको थियो । आज अपरान्ह ४ बजेसम्म आन्दोलन गरेपछि सरकारले बोलाएको दोस्रो वार्ता सफल भएको छ । किसानहरुसँग सरकारले ५ बुंदे सहमति गरेको हो ।

उद्योगमन्त्री लेखराज भट्टको उपस्थितिमा भएको वार्तामा सरकारले तोकेको मूल्य दिनेसहित पाँचबुँदे सहमति भएको हो । यससँगै उखु किसानको आन्दोलन स्थगित भएको छ । सहमतिअनुसार चिनी मिल सञ्चालकहरुले किसानको बक्यौता माघ ७ गतेभित्र उपलब्ध गराउन मन्त्रालयले समन्वय गर्नेछ । साथै भुक्तानीको समस्या हल गर्न स्वचालित मूल्यबारे अध्ययन गर्ने, सरकारले दिने अनुदान समयमै उपलब्ध गराउन मन्त्रालयले अर्थ र कृषिलाई लेखेर पठाउने सहमति भएको छ ।

उखु किसानको सबै वक्यौता रकम एक महिनाभित्र तिर्न सर्लाहीको अन्नपूर्ण सुगर मिल राजी भएको छ । शुक्रबार उद्योग वाणिज्य तथा आपूर्ति मन्त्रालयमा मिल सञ्चालक राकेश कुमार अग्रवालले यसका लागि लिखित प्रतिबद्धता जनाएका हुन् ।

अग्रवालले माइतीघरमा आन्दोलनरत किसानलाई बुधबार र बिहीबार गरेर ५० लाख रुपैयाँ उनीहरुको खातामा पठाइएको जानकारी दिए । उनले गरेको लिखित प्रतिबद्धता अनुसार पुस २५ गतेभित्र मिलले ५ करोड रुपैयाँ किसानको खातामा पठाउने छ ।

यस्तै माघको पहिलो साताभित्र थप ७ करोड रुपैयाँ किसानलाई भुक्तानी गर्ने र १८ गतेसम्म सबै रकम चुक्ता गर्ने प्रतिवद्धा अग्रवालले जनाएको मन्त्रालयका प्रवक्ता एवं सहसचिव दिनेश भट्टराईले जानकारी दिए । उनले उद्योगमा स्टक रहेको चिनी बिक्रीका लागि सहयोग गरिदिन मन्त्रालयलाई आग्रहसमेत गरेका छन् ।

सर्लाहीको महालक्ष्मी सुगर मिल र अन्नपूर्ण सुगर मिलले गरी करिब १ अर्ब रुपैयाँ किसानलाई तिर्न बाँकी रहेको बताईएको छ । उँखु किसानहरु ऋण काढेर काठमान्डौं रकम भुक्तानीको लागि आन्दोलन गर्दै आएका थिए भने उनीहरुलाई देशको विभिन्न ठाउँबाट समर्थन समेत गरिएको थियो ।