थप्पड हान्ने समाचार पूर्ण हावादारी : राज्यमन्त्री यादव

न्यूज ब्यूरो, जनकपुरधाम । प्रदेश २ का भुमि व्यवस्था तथा कृषि सहकारी राज्य मन्त्री योगेन्द्र राय यादवले आफ्नो बारेमा गलत र अफवाह समाचार लेख्ने एक टिम रहेको बताउनुभएको छ ।

मँगलबार नेपाली काँग्रेसकी प्रदेश साँसद प्रमिला देवी दास र आफूबीच चर्काचर्की मात्र भएपछि पत्रकारका एक टिमले थप्पड हानेको समाचार हावादारी रुपमा लेखेको बताउनुभएको छ । प्रदेश सभा भवन बाहिर उपभोक्ता समितिहरुले विरोध प्रदर्शन गरिरहँदा प्रदेश साँसद दास र राज्यमन्त्री रायबीच भनाभन भएको थियो ।

भनाभन र चर्काचर्की भएको स्वीकार गर्दै राज्य मन्त्री रायले हावादारी भरमा मिथ्या र निराधार समाचार प्रकाशन प्रकाशित गरेकोप्रति आपत्ति प्रकट गर्नुभएको छ । बुधबार (आज) न्यूज ब्यूरोसँग कुराकानी गर्दै राज्यमन्त्री रायले गत आर्थिक वर्षमा विभिन्न उपभोक्ता समितिहरुले गरेको कामको ९१ करोड रुपैया अझैँ उपभोक्ता समितिहरुको बक्यौत्ता रहेको र त्यो क्याबिनेटबाट मात्र पास हुने बताउनुभयो ।

भिडियो क्रेडिट : सुमित मिश्रा

"भनाभन र विवाद हुँदै थियो, हामीहरु कुरा गर्दै थियौं, प्रदेश साँसद ज्यू हात यता उता गर्न थाल्नुभयो त्यति मात्र हो, त्यसै बेलामा लिएको फोटोलाई थप्पड हानेको जस्तो बनाएको देखिएको छ । फोटोको एँगलले जे जस्तो देखाएपनि त्यसमा कुनै सत्यता नरहेको छ ।" - उहाँले भन्नुभयो ।

उपभोक्ता समितिहरुले भुक्तानी नपाएपछि विरोध गर्न प्रदेश सभा बाहिर आएका थिए । त्यही प्रदेश नं. २ का अर्थ तथा योजना मन्त्री विजय कुमार यादव विरुद्ध नारावाजी समेत गरेको बताउँदै उहाँले उपभोक्ता समितिको विरोधमा आफ्नो पनि समर्थन रहेको प्रतिक्रिया दिएपनि साँसद दासले कडा शब्दहरु प्रयोग गरेपछि आफू मात्र सम्झाएको बताउनुभयो ।

प्रदेश साँसद दासले मन्त्री राय आफू उपर अपशब्द र कठोर शब्द प्रयोग गरेपछि आफू आक्रोसित भएको प्रतिक्रिया दिएकी हुन् । उपस्थिति प्रदर्शनकारीहरुले महिला साँसद उपर प्रयोग गरेको शब्द अपच र अपशब्द भएको भनेर विरोध समेत गरेका थिए । मन्त्री रायले पनि चर्काचर्कीबीच शब्दहरु निस्केको हुन सक्ने स्वीकार्नुभएको हो ।

यता, प्रदेश साँसद दासले पनि आफू थप्पन नहानेको बताउनुहुँदै समाचारलाई हावादारी बताउनुभयो । न्यूज ब्यूरोसँग कुराकानी गर्दै साँसद दासले त्यहाँ सबै दलका साँसद सहित सँचारकर्मीहरुको पनि उपस्थितिमै चर्काचर्की मात्र भएको प्रतिक्रिया दिनुभएको छ । मँगलबार केही सँचारकर्मीहरुले समाजिक सञ्जाल तथा अनलाईनहरुमा मन्त्री रायलाई थप्पड हानेको भनेर समाचार लेखेपछि मन्त्री रायले खण्डन गर्नुभएको हो ।