कमला अभियानी विक्रम यादवलाई भारतमा सम्मान

न्यूज ब्यूरो, जनकपुरधाम । कमला बचाउ अभियानका सँयोजक एवम् अभियानी विक्रम यादवलाई भारतमा सम्मान गरिएको छ ।

जल तथा नदी बचाउ अभियान सहित पर्यावरण बचाउको लागि अथक प्रयासरत रहनुभएका अभियानी यादवलाई छिमेकी मूलूक भारतमा जल अभियानीको रुपमा सम्मान गरिएको हो । भारतको आजगढमा आयोजित सरयू बचाओ अभियानको वार्षिकोत्सवको अवसरमा उहाँलाई सम्मान गरिएको हो ।

भैरब बाबाधाम महारजगँज आजमगढमा आयोजित सो कार्यक्रमको दौरान उहाँलाई सम्मानित गरिएको हो । मूल सरयू नदी किनारमा सरयू बचाओ अभियानको वार्षिकोत्वसको क्रममा विभिन्न देशबाट आएका अभियानीहरु सहित नेपालबाट कमला बचाउ अभियानका सँयोजक विक्रम यादवले सहभागीता जनाउनुभएको थियो ।

राष्ट्रिय सन्त गाँगेय हँसको अध्यक्षता तथा रामायण सर्किटका चेयरमेन तथा राम आगमन स्थल क्षेत्रमा कार्यरत डा. राम अवतार शर्माको प्रमुख आतिथ्यमा सम्पन्न सो कार्यक्रममा अभियानी यादवले नेपालको ऐतिहासिक नदी कमला नदीको पानी तथा जानकी मन्दिर सज्जित भेंट अर्पण गर्नुभएको थियो । कमला नदी संरक्षणको लागि अभियानको थालनी गर्नुभएका यादवले अभियानलाई देशविदेशमा पुरयाएर नदी संरक्षण गर्ने बताउनुभयो ।

सो वार्षिकोत्सवमा पर्यावरण जोगाउने, जल संरक्षण, वृक्षारोपण उपर वृहत चर्चा परिचर्चा गरिएको थियो । कार्यक्रम सरयू बचाओ अभियानका संयोजक पवन कुमार सिंह र लोकदायित्व आजमगढ उत्तर प्रदेश भारतका अध्यक्ष संजय सिंह गौतमको विशेष पहलमा सम्पन्न भएको हो ।