जानकी मन्दिर मात्रै होइन सबै धर्मको धार्मिक स्थलको प्रचार जरुरी छ : मुख्यमन्त्री राउत

न्यूज ब्यूरो, जनकपुरधाम । प्रदेश नं. २ का मुख्यमन्त्री मो. लालबाबु राउतले प्रदेश भित्रको सबै धार्मिक स्थलहरुको व्यापक प्रचारको आवश्यकता औल्याउनुभएको छ ।

पर्यटकीय पूर्वाधार विकासको जिम्मेवारी प्रदेश सरकारको रहेको बताउनु हुँदै उहाँले प्रदेश भित्र रहेको जानकी मन्दिर सहित सबै धर्मको धार्मिक स्थलहरुको प्रचारवाजी गर्नुपर्ने बताउनुभएको छ । नेपाल भ्रमण वर्ष २०२० प्रदेश नं। २को जिल्ला स्तरीय समन्वय समिति भेलाको समुदघान गर्नु हुँदै मुख्यमन्त्री राउतले प्रदेश भित्र रहेको ऐतिहासिक, धार्मिक, साँस्कृतिक तथा प्राकृतिक सम्पदाहरुको पूर्वाधार विकासमा प्रदेश सरकार गम्भीर रहेको बताउनु भयो ।

उहाँले विकास निर्माणको जिम्मा प्रदेश सरकारले लिने भए पनि प्रचार प्रसार लगायतको क्षेत्रमा सक्रिय भूमिका समन्वय समितिका पदाधिकारीहरुलाई लिन आग्रह गर्नु भयो । उहाँले भन्नु भयो,‘ प्रदेशमा जानकी मन्दिर सहित हिन्दु , इस्लाम, बौद्ध, ज्रैन र शिख धर्मावलम्बीहरुका पनि थुप्रै धार्मिक स्थलहरु छन , त्यसको प्रचार प्रसार हामीले गर्नु पर्दछ । त्यती मात्र गर्न सकिए पर्यटनको क्षेत्रमा हामी ठूलो फडको मार्छौ ।’

विगतमा सरकारको उदासिनताका कारण यस प्रदेशका पर्यटकीय क्षेत्रहरुको विकास हुन नसकेको गुनासो गर्नु हुँदै मुख्यमन्त्री राउतले भन्नु भयो ,‘ जानकी मन्दिर बाटै प्रदेश सरकारले पर्यटकीय पूर्वाधार विकासको काम शुरु गरि सकेको छ । यसै वर्ष सप्तरीको सखडा मन्दिर , सिरहाको सलहेस फुलवारी, महोत्तरीको रौजा मजार, पर्साको भिष्वा डाडा सहितको स्थानमा गुरुयोजना सहित काम शुरु हुन्छ ।’

उद्योग , पर्यटन वन तथा वातावरण मन्त्री एवं पर्यटन वर्ष २०२०का प्रदेश अध्यक्ष राम नरेश रायको अध्यक्षतामा भएको उक्त कार्यक्रममा प्रदेश सभा सदस्य राम अशिष यादव, परमेश्वर साह, नीति आयोगका उपाध्यक्ष डा. भोगेन्द्र झा, जनकपुरका पूर्व मेयर बजरंग साह, नेपाल पत्रकार महासंघ धनुषाका अध्यक्ष अनिल मिश्र, नेपाल भ्रमण वर्ष २०२०का प्रदेश संयोजक मनिष झा सहितका वक्ताहरुले सम्बोधन गर्नु भएको थियो ।

कार्यक्रममा आठै जिल्लाका समन्वय समितिका पदाधिकारी एवं सदस्यहरुको उपस्थिति रहेको थियो ।