विहानै बमको शंकाले जनकपुरमा तनाव, प्रहरी एक्सनमा

न्यूज ब्यूरो, जनकपुरधाम । एकाविहानै जनकपुरको मुख्य स्थानमै शंकास्पद वस्तु फेला परेपछि जनकपुरवासीमा पुनः तनावको माहौल सृजना भएको देखिएको छ ।

जिल्ला प्रहरी कार्यालय धनुषादेखि करिब ३०० मिटरको मात्र दुरीमा रहेको जनकपुरधाम उपमहानगरपालिका वडा नं. ४ भैरवचोक स्थित बीच बाटोमै शंकास्पद वस्तु फेला परेपछि प्रहरीले उक्त क्षेत्रलाई घेरा हाली नियन्त्रणमा लिएको हो । सुरक्षाको दृष्टिकोणले त्यस सडकमा सर्वसाधारणहरुको आवत जावत बन्द गरिदिएको हो ।

जनकपुरको रामचोक र मुरलीचोक (विद्यापति)को बीचमा रहेको शुक्रबारी बजारको नजिकै उक्त शंकास्पद वस्तु फेला परेको हो । कालो प्लास्टिकमा बेरिएर राखिएको वस्तु बम हुन सक्ने आशंकामा प्रहरीले पूर्व सुरक्षा सतर्कता अपनाएको हो । हालाकी कैयौं ठाउँमा भेटाएको शंकास्पद वस्तु फोहोरको थैला सहित अन्य वस्तु भएपनि त्यसलाई सुनुयोजित र त्रासको लागि राखिएको भनिएको छ ।

केही दिन अगाडी मात्र धनुषाको महेन्द्रनगरमा भएको शक्तिशाली विस्फोटमा एक प्रहरी ईन्स्पेक्टर सहित २ जनाको मृत्यू भएपछि प्रहरीले शंकास्पद वस्तुलाई हलुको नलिएर सुरक्षा सर्तकता अपनाउँदै आएको छ । यद्यपी अहिलेसम्म बम हो वा होईनन भने यकिन भईसकेको छैनन भने चेकजाँचको लागि नेपाली सेनाको बम डिस्पोजल टोलीलाई खवर गरेको तथा डिस्पोजल टोली आएपछि मात्र यकिन गर्न सकिने बताइएको छ ।