धनुषा : आगलगी हुँदा ४ बाख्रा पनि जलेर ध्वस्त !

न्यूज ब्यूरो, जनकपुरधाम । धनुषामा गएराती भएको आगलगीमा परी एक घर जलेर नष्ट भएको छ भने त्यसमा बाँधिएको ४ बाख्रा समेत जलेर ध्वस्त भएको छ ।

धनुषाको धनुषाधाम नगरपालिका वडा नं. ५ नौसय बिघामा गएराती गोठमा बालिएको आगो सल्केर आगलगी भई घर जलेर पूर्ण रुपमा ध्वस्त भएको प्रहरी चौकी उमाप्रेमपुरले जनाएको छ । स्थानीय राम नारायण महराको घरमा आगलगी हुँदा ४ ओटा बाख्रा समेत जलेर नष्ट भएको छ भने मानवीय क्षति हुनबाट जोगिएको छ ।

गएराती (बुधबार) करिब १०ः१५ बजेको समयमा महराले आफ्नै गोठघरमा लगाएको घुँराबाट आगो सल्केर आगलगी भएको प्रहरीले जनाएको छ । समयमै प्रहरीले आगो नियन्त्रण गर्न नगरको बरुणयन्त्र बोलाएर नियन्त्रणमा लिएको थियो । स्थानीय बासिन्दा र नेपाल प्रहरीले आ–आफ्नो ठाउबाट सहयोग गरि आगो नियन्त्रणमा लिएको उमाप्रेमपुर प्रहरी चौकी इन्चार्ज गोपाल श्रेष्ठले जानकारी दिनुभएको छ ।

गत सातादेखि नै तराई मधेशको विभिन्न जिल्लामा शितलहर सुरु भएको छ । चिसो बढेसँगै सर्वसाधारणले आफ्नो गोठ घरमा अनिवार्य रुपमा घुँर (दाउरा बालेर आगो ताप्ने) लगाउने गरिन्छ । असावधानीका कारण आगलगी भएको जनाइएको छ । आगलगीबाट मानवीय क्षति नभएको जनाउँदै प्रहरीले करिब ३ लाख मूल्य बराबरको क्षति भएको जनाइएको छ ।

गरिबीको चपेटामा रहेका महरा परिवारमा एक महिने सुत्केरी समेत रहेकोले उनलाई थप पीडा भएको स्थानीयवासीहरु बताउँछन् । घर जलेर नष्ट हुनुका साथै आम्दानीको स्रोतको रुपमा रहेको बाख्रा पनि जलेर नष्ट भएपछि थप विजोग भएको छ ।