मारुती सिमेन्ट फ्याक्ट्रीले दुर्व्यवहार गर्दा मजदुरद्धारा आत्महत्या, न्याय माग्दै मजदुर

न्यूज ब्यूरो, सिरहा । मारुती सिमेन्ट फ्याक्ट्रीकी एक महिला मजदुरले दुर्व्यवहारका कारण आत्महत्या गरेकी छन् ।

सिरहाको गोलबजार-९ स्थित पूर्वपश्चिम राजमार्गमै रहेको मारुती सिमेन्ट फ्याक्ट्रीमा कार्यरत गोलबजार-९ गोविन्दपुरकी अन्दाजी ४८ वर्षीया अनिता पासमान अपमानकै कारण आत्महत्या गरेकी हुन् ।

मारुती सिमेन्टको स्थापनाकाल (करिब १८ वर्ष) देखि नै कार्यरत अनितासहित कार्यरत मजदुरहरुले गत मंसिर ६ गते फ्याक्ट्री विरुद्ध आन्दोलन गरेका थिए । मजदुरहरुको निर्धारित १८ हजार तलबबाट फ्याक्ट्रीले चिया नास्ताको नाममा रुपैयाँ कटौती गरेपछि उनीहरू आन्दोलनमा उत्रेका थिए ।

काम सुरु गरेको ८ वर्षपछि विगत ११ वर्षदेखि स्थायी रुपमा काम गर्दै आएका उनीहरूलाई पहिला भने चिया नास्ता फ्याक्ट्रीले दिँदै आएको थियोे । तर, अचानक तलबबाट ५ सय माथिसम्म कटौती गरेपछि उनीहरू आन्दोलनमा उत्रिन बाध्य भए ।

कर्मचारी युनियनकी सदस्य समेत रहेकी अनिताले कर्मचारीको तलब कटौतीपछि भएको आन्दोलनमा अगुवाको रूपमा आवाज उठाएकी थिइन् । तलबबाट कटौती गरेरमात्र मात्र दिने भनेपछि कर्मचारी युनियनको हैसियतले मजदुरको न्यायको लागि उनी आवाज उठाइन् ।

तलबबाट कटौती गरेपछि फ्याक्ट्रीको प्रशासनविरुद्ध आवाज उठाएकी अनितासहित ५ जनालाई स्पष्टीकरण सोधेको थियो । अनितासहित सम्भा यादव, मोहन प्रसाद यादव, मिथिलेश यादव र विनोद महतोलाई स्पष्टीकरण सोधिएको थियो । मंसिर ६ गते स्पष्टीकरण सोधिएको उनीहरुमध्ये अनितालाई मंसिर २३ गते सोमबार मात्र निलम्बन गरिएको थियो ।

सोमबार उनलाई निलम्बन गरेको सूचना टाँस गरिएको र आज फ्याक्ट्री भित्र पस्न खोज्दा त्यहाँका सेकुरिटी गार्डले प्रहरी बोलाएर धक्कामुक्का गर्दै अपमान गरेपछि उनी आत्महत्या गर्न बाध्य भएको एक मजदुरले भक्कानिदै सुनाए । मंगलबार विहान ८ बजे अनितासहित अन्य मजदुरले पनि फ्याक्ट्रीभित्र पस्न खोज्दा अनिता बाहेक सबैलाई भित्र जान दिएको र अनितलाई मात्रै नजानदिएपछि अनिता जबरदस्ती भित्र पस्न खोजेकी थिइन् ।

फ्याक्ट्रीको आधिकारिक व्यक्तिको ईसारामा तत्कालै प्रहरी बोलाएर अनिताको परिचय पत्र सहित अन्य कागजातहरु खोसेर अपमान गरेपछि केही बेरमै उनी फ्याक्ट्रीको नजिकै रहेको सिसबोनी (सिसौका रुखहरुको बगैचा) मा गएर झुन्डिइन् । स्थापनाकालदेखि नै मारुती सिमेन्ट फ्याक्क्ट्रीमा काम गर्दै आएकी अनितालाई अपमानीत गरेर निकालिएपछि उनी अपमान सहन नसकेर आत्महत्या गरेकी हुन् ।

मजदुरहरुले अनितालाई आत्महत्या गर्न फ्याक्टरीले बाध्य बनाएको बताउँदै हत्या सरह नै भएको भन्दै आक्रोशित छन् । अनिताको आत्महत्यापछि मजदुरहरुले फ्याक्ट्रीलाई कारवाहीको माग गर्दै फ्याक्ट्री अगाडी टायर बालेर प्रदर्शन गरेका छन् । प्रहरी बलले स्थितिलाई नियन्त्रणमा लिन प्रयास गरेपनि झण्डै ४५ मिनेटपछि स्थिति नियन्त्रणमा आएको थियो ।

पूर्वपश्चिम राजमार्गमै रहेको मारुती सिमेन्ट फ्याक्ट्री अगाडी प्रदर्शन चर्किएपछि केही बेर सवारी साधनहरु समेत चल्न सकेनन् । न्याय नभएसम्म आन्दोलन जारी राख्ने एकजना मजदुर अगुवाले जनाए । अन्य मजदुरहरुको न्यायको लागि आवाज उठाउँदा उनीसँग अन्याय गरिएको मजदुरहरुको आरोप छ । चार सन्तान रहेकी अनिताको श्रीमान राम दयाल पासवानको मानसिक अवस्था राम्रो छैन ।

घटनाको जिम्मा फ्याक्ट्रीले नलिएपछि परिवारले शव बुझ्न मानेका छैनन् । सहमतिको लागि छलफल भएपनि आज निष्कर्ष आएन । शव घटनास्थलमै राखिएको छ । यता, यस सन्दर्भमा मारुती सिमेन्टका व्यवस्थापक मनोज श्रेष्ठसँग सम्पर्क गर्न खोज्दा सम्पर्क हुन सकेन ।