सिरहामा हात्तीले लियो बालकको ज्यान

न्यूज ब्यूरो, सिरहा । सिरहामा हात्तीले एक बालकको ज्यान लिएको छ ।

सिरहाको मिर्चैया नगरपालिका-९, पैनघट्टामा सोमबार राति हात्ती आक्रमणमा परेर एक बालकको मृत्यु भएको हो । मृत्यु हुनेमा स्थानीय श्रवण महतोको ८ वर्षीय छोरा रविन्द्र महतो छन् ।

बुवाछोरा घरमा सुतिरहेका बेला राति ११ बजेतिर अचानक हात्तीले आक्रमण गरेको ईलाका प्रहरी कार्यालय मिर्चैयाले जनाएको छ । हात्तीले बाहिरबाट घरमा आक्रमण गर्दा बुवाले छोरालाई लिएर बाहिर भाग्न खोजेपछि छोरा रविन्द्रलाई सुँडले खोसेर आँगनमा लछारपछार गर्दै खुट्टाले कुल्चेको मिर्चैयाका डिएसपी सुकदेव खनालले न्यूज ब्यूरोलाई जानकारी दिए ।

बालकको घटनास्थलमै मृत्यु भएको छ भने बुवा सकुशल रहेका छन् । घटनाबारे जानकारी पाएपछि प्रहरीले बिहान घटनास्थल पुगेर मुचुल्का उठाएको छ । मृतक बालकको शव पोष्टमार्टमको लागि रामकुमार सारडा उमाप्रसाद मुरारका अस्पताल लहान लगिएको प्रहरीले जनाएको छ ।

हात्तीको आक्रमणबाट घरमासमेत क्षति पुगेको छ । हात्तीले बालकको ज्यान लिएपछि त्यसक्षेत्रका बासिन्दा त्रसित बनेका छन् ।