वीरगँज : आमाछोरीको लास घरमै कुहिएर गन्हाएपछि...

न्यूज ब्यूरो, वीरगँज । प्रदेश नं. २ को वीरगँजमा एक कोठामा आमा छोरीको कुहिएको शव (लास) फेला परेको छ ।

वीरगँज महानगरपालिका वडा नं. १२ नयाँ टोलमा सोमबार साँझ आमा छोरीको शव फेला परेको हो । बाराको कलैया उपमहानगरपालिका वडा नं. २६ सिसुवा महेशपुर घर भई मुर्ली नयाँ टोल निवासि मोहन झाको घरमा कोठा भाडा लिएर बस्दै आएका पवन साहकी श्रीमति र छोरीको शव कुहिएको अवस्थामा फेला परेको हो।

पेन्टिंगको काम गर्ने पवन साह आफ्नो श्रीमती र छोरी सहित उक्त घरमा बस्दै आएका थिए। पेन्टर साहकी अन्दाजि बर्ष २२ की श्रीमति र अन्दाजी बर्ष २ की छोरीको शब फेला परेको प्रहरी निरिक्षक चक्र बहादुर मल्लले जानकारी दिए । धेरै दुर्गन्ध फैलिएपछि घरबेटि झाले वडा प्रहरीलाई खबर गरेका थिए ।

वडा प्रहरी कार्यालय श्रीपुरको टोलिले ढोकाको ताल्चा फुटाएर हेर्दा कुहिएको अवस्थामा सोमबार अबेर राती शव बरामद गरिएको हो। प्रहरीले मुचुल्का उठाएर मृतकका श्रीमान पेन्टर पवन फरार रहेको हुँदा खोज तथा अनुसन्धान तिव्र पारिएको प्रहरीले जनाएको छ । पवन फरार भएपछि उनले नै मारेर भागेको हुन सक्ने अनुमान गरिएको छ । यस उपर प्रहरीले अनुसन्धान थालेको हो ।