संघीयताको पुरै स्वाद स्थानीय तहले चाखेन : वडाध्यक्ष महतो

न्यूज ब्यूरो, जनकपुरधाम । धनुषाको बटेश्वर गाउँपालिका वडा नं. १ का वडाध्यक्ष शैलेन्द्र कुमार महतोले संघीयताको पुरै स्वाद स्थानीय तहले चाख्न नसकेको बताएका छन् ।

आईतबार बटेश्वर गाउँपालिकाको वडा नं. १ चित्रपुरमा आयोजना गरिएको संघीय शासन अभ्यासमा स्थानीय तह विषयक अभिमुखीकरण कार्यक्रममा प्रमुख अतिथिको आसनबाट बोल्दै वडाध्यक्ष महतोले देशमा संघीयता आएको ३ वर्ष भईसक्दा पनि संघीयताको अनूभूति भने स्थानीय तहमा गर्न नसकिएको बताएका हुन् ।

देशमा संघीयता आएपनि संघ, प्रदेश र स्थानीय तहको सरकारले समन्वय गर्न नसकेको कारण संघीयता बेअर्थ लागेको उनले बताए । उनले भने, - "संघीयता आएको ३ वर्ष भयो, तर स्थानीय सरकारले त्यही सघीयतालाई टेकेर गठन भएपनि संघको कब्जा कायमै छ जसको कारण स्थानीय सरकारको अनूभूति कम भएको देखिएको छ । जनताले हामी जनप्रतिनीधिलाई खोज्ने हो तर संघको आचरण र शक्ति केन्द्रीत भएको कारण जनभावना अनुसार काम गर्न असक्षम भएको महसुस भएको छ ।"

नागरिक सहकार्य मँचको आयोजना तथा सपोर्ट नेपाल धनुषाको सहकार्यमा सम्पन्न भएको सो अभिमुखिकरण कार्यक्रममा विभिन्न ठाउँको ३५ महिला पुरुषलाई सहभागीता गराइएको थियो । उनीहरुले जनप्रतिनीधिप्रतिको गुनासो र प्रशंसा बारे खुलेर बोलेका थिए । स्थानीय तहको शासनमा जनताले भोगेको दुःख, पाएको सुविधाको बारेमा औल्याइएको थियो ।

नागरिक सहकार्य मँचका अध्यक्ष इन्दल कुमार सिँहको अध्यक्षता एवम् वडाध्यक्ष महतोकै प्रमुख आतिथ्यमा सम्पन्न भएको अभिमुखिकरण कार्यक्रममा उमेश यादव र देव सागर दासले सहभागीहरुलाई सहजता प्रदान गरेका थिए । सपोर्ट नेपाल धनुषाका कार्यक्रम सँयोजक प्रकाश ठाकुरले भने व्यवस्थापन गरेका थिए ।