सिरहा : औरही गापामा विकासको काममा एक भएर बढ्ने सर्वदलीय सहमति

न्यूज ब्यूरो, सिरहा । सिरहाको औरही गाउँपालिकामा विकास निर्माणको कार्यमा राजनीतिक पूर्वाग्रह नराखी एक भएर अघि बढ्ने सहमति भएको छ ।

जनचेतना यूवा समाज केन्द्र औरहीको अगुवाईमा शनिबार बसेको सर्वदलीय बैठकबाट यस्तो सहमति जुटेको हो । विभिन्न पार्टीबीच राजनीतिक पूर्वाग्रह र पार्टीगत सोचका कारण विवादले गर्दा औरही गाउँपालिकामा विकास निर्माणको कामले गति लिन सकेको छैन ।

समाजको विकास साझा मुद्दा भएकाले दलिय र सर्वपक्षय सहमति एकता गरी विकास कार्यलाई अगाडी बढाउने सहमति गरिएको हो । सबैले मिलेर विकास निर्माणको कामलाई अघि बढाएमात्र समृद्ध समाज निर्माणको परिकल्पना पूरा हुने भन्दै अन्ततः उनीहरु सर्वदलीय सहमति गरी एकताको कठघरामा आएका हुन् ।

सबै दलले जनभावनालाई कदर गर्दै विकासको कार्यमा एक भएर अगाडि बढ्ने सर्वदलीय सहमति गरेपछि यस गाउँपालिकामा अब विकास निर्माणका कामले गति लिने विश्वास गरिएको छ ।