जनकपुर : कुस्ती खेल भईरहेको नजिकै विस्फोट हुँदा बालक घाईते, धरान रिफर !

न्यूज ब्यूरो, जनकपुरधाम । जनकपुरमा भईरहेको (South Asian Games -SAG) सागको कभर्ड हल नजिकै पटाखा विस्फोट हुँदा एक बालक घाईते भएको छ ।

जनकपुरधाम उपमहानगरपालिका वडा नं. १३ कभर्ड हल नजिक भईरहेको साग प्रतियोगिता नजिकै एक बालकले पटाखा पडकाउँदा घाईते भएको हो । घाईते हुनेमा आलोक नामक बालक रहेको जनाईएको छ । यसअघि बम विस्फोटको हल्ला भएकोप्रति धनुषाका प्रमुख जिल्ला अधिकारी प्रदीप कनेलले पटाखा विस्फोट मात्र भएको बताएका छन् ।

घाईते बालकलाई उपचारको लागि जनकपुरको प्रादेशिक अस्पतालमा लगिएपनि उपचार सम्भव नहुँदा थप उपचारको लागि विपि कोईराला स्वास्थ्य विज्ञान प्रतिष्ठान धरानमा रिफर गरिएको छ ।

शुक्रबारदेखि जनकपुरमा भएको साग अन्तर्गतको कुस्ती प्रतियोगिताको क्रममा उदघाटन खेलमा पडकाइएको पटाखा भुलवंश कतै छुटेको हुन सक्ने र त्यहाँका गएका आलोकले त्यही पडकाएको बताइएको छ । न्यूज ब्यूरोसँग कुराकानी गर्दै सिडिओ कनेलले भने, -"धनुषाका प्रहरीलाई त्यहाँको सुरक्षा जिम्मेवारी दिइएको थियो । प्रहरीबाट सुरक्षामा चुक भएको स्वीकारे ।"

पटाखा अनुमति लिएर ल्याएको बताउँदै उनले त्यहाँ कसरी पटाखा छुट भयो त्यसको जिम्मेवारी प्रहरी र सुरक्षा समितिले लिनुपर्ने बताए । आयोजक समितिले पनि त्यसको जिम्मेवारी लिनुपर्ने उनले थपे । यता, आयोजक समितिका अध्यक्ष कमल चौधरीले भुलवंश पटाखा छुटेको र बालकले पडकाउँदा घटना भएको स्वीकारेका छन् ।

न्यूज ब्यूरोसँगको कुराकानीमा उनले उदघाटनको क्रममा पडकाइएको पटाखामा जलेर केही अंश बाँकी रहेको पटाखा बालकले पडकाउँदा घटना भएको बताउँदै आयोजक समितिको टोली समेत बालकसँग गएको बताएका छन् । यसबारे थप विवरण आउन बाँकी छ ।