स्वस्थ समाज र देश निर्माणको लागि योग शिक्षा र अभ्यास आवश्यक : नेता यादव

न्यूज ब्यूरो, सिरहा । राष्ट्रिय जनता पार्टी (राजपा) नेपालका अध्यक्षमण्डलका सदस्य एवं संघीय सांसद राजकिशोर यादवले निरोग रहन योग शिक्षा र अभ्यास आवश्यक रहेको बताएका छन् ।

सिरहाको विष्णुपुर गाउँपालिका–२ राजपुरमा विहीबार सातदिने श्री मद्भागवत सप्ताह ज्ञान महायज्ञ तथा योग विज्ञान शिविर कार्यक्रमलाई उद्घाटन गर्दै नेता यादवले यस्तो आवश्यकता औल्याएका हुन् । उनले मानवले निरोग रहन योग शिक्षा र अभ्यास अनिवार्य रुपमा गर्नुपर्ने सुझाव दिए ।

नेता यादवले स्वस्थ समाज र देश निर्माण गर्न योग शिक्षाको आवश्यकता रहेको र त्यसलाई प्रभावकारी कार्यान्वयनमा जोड दिए । बढ्दो आधुनिकरण, अस्तव्यस्त जीवन शैली, हावा पानी तथा वातावरणमा भइरहेको प्रदुषण, अस्वस्थकर खानपान, अस्वस्थ प्रतिष्पर्धा जस्ता विषयवस्तुको कारण मानिसहरु रोगी बन्दै गएकाले तनाव, दवाव र प्रभावबाट मुक्त गरी स्वस्थ जीवन यापनका लागि योग जरुरी रहेको उनले बताए ।

योग रोगलाई टाढै राख्ने र तनमनलाई शान्त बनाउने अमृत रुपी विज्ञान भएकोले सबै नागरिकहरुले दैनिक रुपमा योग अभ्यास गर्न आवश्यक रहेको नेता यादवले धारणा राखे । स्वस्थ समाज र देश निर्माणमा सबैले योगदान गर्नुपर्ने उनले बताए ।

नेता यादवले योग अभियन्ताहरुलाई अपेक्षा अनुसारको काम गर्न सुझाव दिँदै आफूले गर्नुपर्ने हरेक प्रकारको सहयोग गर्न तयार रहेको प्रतिवद्धता पनि जनाए ।