जनकपुरमा २१६ जनाको सामूहिक विवाह, ठाकुरले दिए २५ वटा मँगलसूत्र

न्यूज ब्यूरो, जनकपुरधाम । दाईजो प्रथालाई उन्मूलन गर्न जनकपुरमा २ सय १६ जनाको एकैपटक सामूहिक विवाह गरिएको छ ।

जनकपुरको मणिमण्डप (रामसीता विवाहस्थल) मा विश्व हिन्दु परिषद्को आयोजना तथा व्यवस्थापनमा १ सय ८ जोडी (२१६ जना, बेहुला बेहुली सहित) लाई सामुहिक आदर्श विवाह गराइएको हो । सोमबार सामूहिक विवाह कार्यक्रमको आयोजना गरेर विवाह गराइएको हो ।

प्रत्येक जोडीको लागि छुटाछुट्टै मण्डप अर्थात मडबा बेदी बनाइएको जनाइएको छ । सामुहिक विवाहको लागि जनकपुरका सहयोगी हातहरुले सहयोग गरेको जनाइएको छ । विश्व हिन्दु परिषद् नेपालका राष्ट्रिय उपाध्यक्ष काशिन्द्र यादका अनुसार, जन्तीको खानपान, बेहुलाबेहुलीको लुगाफाटो, सरसमान, बेहुलीलाई सुनको मंगलसुत्र सबै सहयोगी हात खोजेर जुटाइएको छ। अंग्रेजी बाजा, रथ पनि व्यवस्थापन गरिएको छ।

सो सामुहिक वैवाहिक कार्यक्रममा सहभागीहरुको अत्याधिक लोडको कारण मँच नै भत्किएको थियो । मँच भत्किएपछि केही बेर वैवाहिक कार्यक्रममा भागमभाग भएको थियो भने उपस्थित सुरक्षाकर्मीहरुले तत्काल स्थिति नियन्त्रणमा लिएको थियो ।

प्रदेश नं. २ को मुख्यमन्त्री लालबाबू राउतको बेटी पढाउ बेटी बचाउ अभियान अन्तर्गत पनि गरिएको जनाइएको छ । मुख्यमन्त्री राउत पनि वैवाहिक कार्यक्रममा सहभागी भएका छन् ।

हिन्दु परिषद्ले गरेको सामुहिक विवाहको आह्वानमा तराई मधेशको विभिन्न जिल्लाका बेहुला बेहुली पक्षले विवाहको लागि फारम भरेका थिए । कानुन अनुसार बेहुला बेहुलीको विवाह गर्ने उमेर पुगेको हुनु पर्ने शर्त राखिएकोले २० वर्ष माथिका बेहुलाबेहुलीहरुको अभिभावकले फाराम भरेको थियो । आवेदन फाराममा वर र बधुको उमेर खुल्ने नागरिकता वा जन्मदर्ता संलग्न गरिएको थियो ।

यता, सामुहिक विवाहको लागि जनकपुरका चिरपरिचित सुनचाँदी व्यवासायी पवन ठाकुरले २५ ओटा मँगलसूत्र निःशूल्क उपलब्ध गराएका छन् । १ सय ८ जोडीको लागि चाहिने १०८ ओटा मँगलसूत्र भने जनकपुरका सुनचाँदी व्यवसायीहरुले समेत सहयोग गरेका छन् भने पवन ठाकुर एक्लै आफ्नो तर्फबाट २५ ओटा मँगलसूत्र प्रदान गरेका हुन् ।

न्यूज ब्यूरोसँग कुराकानी गर्दै व्यवसायी ठाकुरले एउटा मँगलसूत्रको मूल्य करिब ४ हजार ५ सय रुपैयाँ रहेको छ । कुल ४ लाख ८६ हजार मूल्य बराबरको मँगलसूत्र व्यवसायीहरुले निःशूल्क सहयोग गरेका छन् । विवाहको नाममा लिने दाईजो (दहेज) प्रथालाई चुनौति दिँदै ती जोडीहरुलाई आदर्श विवाह गरिएको जनाइएको छ ।