धनुषा : घरबाटै बच्चा चोरी !

न्यूज ब्यूरो, जनकपुरधाम । धनुषामा गएराती आफ्नै घरमा सुताएको अवस्थामा एक बच्चा चोरी भएको छ ।

धनुषाको सबैला नगरपालिका वडा नं. १० खरिहानी टोल बस्ने स्थानीय दीपनारायण साहको १४ महिने बच्चा गोलु साह आफ्नै घरबाट चोरी भएका हुन् । साहले सँचालन गर्दै आएको पसलमा रहेको बेला गोलु आफ्नै घरमा दुई जेठो दिदी भाईसँग सुतिरहेका थिए । पसल बन्द गरेर राती करिब ८ बजे आफ्नो घर आउँदा गोलुलाई नदेखेपछि उनलाई कसैले उठाएर लगेको थाहा पाएको उनका आफन्तले जानकारी दिएको छ ।

परिवारजनका अनुसार गोलु एक जेठी दिदी र एक जेठो दाईसँग एउटै ओछयानमा बीचमा सुतेका थिए । आईतबार राती करिब ८ बजेतर्फ नै कसैले उनलाई उठाएर लगेको जनाइएको छ । यस घटनाबारे स्थानीय प्रहरीलाई समेत जानकारी गराउँदै बच्चा खोजबिनमा रातीदेखि नै आफन्तहरु डुल्दैछन् ।

बच्चा कसले र किन चोरेको बारे केही थाहा नभएको स्थानीय प्रहरीले जनाएको छ । उनका आफन्तका अनुसार, दीपनारायणसँग गाउँमै एक महिलाको अनैतिक सम्बन्धबाट जन्मेकोमा कानुनी प्रक्रियामा गएर गोलुलाई पालनपोषणको जिम्मा दिइएको थियो ।