प्रदेश प्रमुख परियारको स्वकीय सचिव (P.A.) मा 'पासवान'

न्यूज ब्यूरो, जनकपुरधाम । हालै नियुक्त प्रदेश नं. २ का प्रदेश प्रमुख तिलक परियारको स्वकीय सचिव (पिए) मा धनुषाका अनिल कुमार पासवानलाई नियुक्त गरिएको छ ।

राष्ट्रिय युवा संघका केन्द्रिय सदस्य समेत रहेका पासवानलाई प्रदेश प्रमुख परियारले आफ्नो स्वकीय सचिवमा नियुक्त गरेका हुन् । माओवादी जनयुद्धकालमा लडाकू रहेका (पूर्व लडाकु) पासवानलाई परियारले आफ्नो स्वकीय सचिवमा नियुक्त गरेपछि उनलाई बधाईको ओइरो लागेको छ । धनुषाको औरही गाउँपालिका वडा नं. ३ बस्ने पासवान अहिले मूलधारको राजनीतिमा नेकपाबाट सक्रिय छन् ।

१० वर्षे माओवादी जनयुद्धकालमा पासवान जनमुक्ति सेनामा लागि सर्वहारा वर्गको उत्थान तथा परिवर्तनका लागि युद्धमा होमिएका थिए । जनमुक्ति सेनामा हुँदा पासवान कम्पनी भाईस कमान्डर थिए । तात्कालीन नेकपा माओवादी केन्द्र निकट वाइसियलका प्रदेश २ का सहसंयोजक समेत रहिसकेका पासवान अहिले राष्ट्रिय युवा संघका केन्द्रिय सदस्य समेत भएका छन् ।

संघीय सरकारले सातवटै प्रदेशका प्रदेश प्रमुखलाई पदमुक्त गरी नयाँ प्रदेश प्रमुखहरु नियुक्त गरेकोमा प्रदेश नं. २ को लागि तिलक परियारलाई नियुक्त गरिएको हो । विगतदेखि नै परियारसँग निकट मानिएका पासवानलाई क्षमता र कौशलताको आधारमा स्वकीय सचिवको रुपमा नियुक्त गरिएको जनाइएको छ ।