वडाध्यक्ष नै घुस सहित रँगेहात पक्राउ

न्यूज ब्यूरो, विराटनगर । घुस लिरहेको अवस्थामा एक गाउँपालिकाका वडाध्यक्ष रँगेहात पक्राउ परेका छन् ।

मोरङ जिल्ला जहदा गाउँपालिका वडा नं. १ का वडाअध्यक्ष उमेशकुमार साहलाई अख्तियार दुरुपयोग अनुसन्धान आयोगको टोलीले रँगेहात पक्राउ गरेको हो । वडाध्यक्षले वडा नं. १ स्थित, हरिलाल सर्वरियाको घरदेखि बाँधसम्मको ग्राभेल सडक निर्माण योजनाको सम्झौता गरी कार्यान्वयन लगायतका कार्यमा सहजिकरण गरी दिने प्रयोजनका लागि घुस रकम माग गरिरहेको भन्ने सूचनाको आधारमा उनलाई पक्राउ गरिएको जनाइएको छ ।

अख्तियार दुरूपयोग अनुसन्धान आयोगको कार्यालय इटहरीबाट खटि गएको टोलीले उनलाई सेवाग्राहीसँग २१ हजार रुपैयाँ घुस रिसवत लिसकेको अवस्थामा वडा नं. १ बुधनगरको वडा कार्यालयबाट घुस रकम सहित नियन्त्रणमा लिएको अख्तियार दुरुपयोग अनुसन्धान आयोग टंगालका प्रवक्ता प्रदीप कुमार कोईरालाद्धारा जारी गरिएको प्रेस विज्ञप्तिमा उल्लेख छ ।