गायक जागेश ठाकुरको 'तारा जेका' सार्वजनिक

न्यूज ब्यूरो, जनकपुरधाम । मधेश क्षेत्रमा उदाउँदा गायक जागेश ठाकुरको ‘तारा जेका’ बोलको नयाँ गीत सार्वजनिक भएको छ ।

मैथिली भाषाका कयौं गीत गाउँदै सांगीतिक यात्रामा लम्किरहेका गायक ठाकुरको तारा जेका गीतको म्यूजिक भिडियोलाई डिटिथ्री टिभी नामक यूट्युब च्यानल मार्फत् सार्वजनिक गरिएको हो । गायक ठाकुरको स्वरले सज्जित उक्त मैथिली गीत उनी आफैले रचना गरेका हुन् ।

गीतको म्यूजिक भिडियोमा सुवास संकल्पको छायांकन तथा निर्देशन रहेको छ भने अभिनय मेली बस्नेत र बिरेन्द्र कुमार साहको रहेको छ । म्यूजिक भिडियोको बीचबीचमा गायक ठाकुरको समेत झल्को दिइएको छ । मेगा म्यूजिक मिर्चैयामा रेकर्डिङ गरिएको उक्त गीतमा दीपेन्द्र साहले संगीत सजाएका छन् ।

भिडियोको लागि प्रोडक्सन म्यानेजमेन्ट सुस्मिता श्रेष्ठ र पौडेलले मिलाएका छन् भने पोष्ट प्रोडक्सन परिकला मिडिया प्रा. लि. (डिटिथ्री टिभी) ले गरेको छ । भिडियो अभिनयकर्ताको मेकअप भने रिता श्रेष्ठले गरेकी छन् ।

गीतमा गहिरो प्रेममा डुबेको अवस्थाको सभ्य शब्दले चित्रण गरिएको छ । गत शुक्रबार मात्र रिलिज भएको उक्त गीतले मार्केटमा निकै राम्रो रिस्पोन्स पाएको छ ।

गायक ठाकुरको यसअघिका कयौं गीत हिट भएका छन् । अन्य गीतभन्दा बढी लगानी र मेहनेतले बनाइएको यो म्यूजिक भिडियो दर्शक र श्रोतामाझ झन लोकप्रिय हुने गायक ठाकुरले विश्वास लिए ।