जनकपुरमा भारत विरुद्ध ओर्ले युवासंघ

न्यूज ब्यूरो, जनकपुरधाम । नेकपा निकट भाृत संगठन राष्ट्रिय युवा संघले भारत विरुद्ध जनकपुरमा प्रदर्शन गरेको छ ।

नेपालको दक्षिणी केही भूभागलाई भारतले जारी गरेको नयाँ राजनीतिक नक्सामा गाभेपछि युवा संघले त्यसको विरोध गर्दै जनकपुरमा भारत विरुद्ध प्रदर्शन गरेका हुन् । राष्ट्रिय युवा संघ धनुषाको आयोजनामा जनकपुरमा ‘गोे ब्याक इण्डिया’, ‘लिपुलेक, कालापानी र लिम्पियाधुरा हाम्रो हो’ लगायतका नारा सहित भारत विरुद्ध प्रदर्शन गर्दै बजार परिक्रमा गरेका थिए । भारतले जम्मु कश्मिरलाई नयाँ राजनीतिक नक्सामा देखाउने उदेश्यले जारी गरेपछि नेपालको भूभाग समेत समेटेको पाइएपछि विरोध भएको हो ।

भारतको ज्यादती र थिचोमिचो सहेर बस्न नसक्ने चेतावनी दिँदै भारतीय प्रधानमन्त्री नरेन्द्र मोदी मुर्दावादको नारा समेत लगाएका थिए । विरोधमा उत्रिएकाहरुले पश्चिम नेपालको लिपुलेक, कालापानी, लिम्पियाधुरालगायतको अतिक्रमित क्षेत्र फिर्ता गर्न माग गरेका छन् ।

राष्ट्रिय युवा संघ नेपाल धनुषाद्वारा भारतिय नक्सामा हाम्रो भूभाग प्रकाशित गरिएकोले त्यसको विरोध स्वरुप जनकपुरको नगर परिक्रमा गरि जिल्ला प्रशासन कार्यालयमा ज्ञापनपत्र बुझाइ मोटर साइकल रयाली समेत निकालिएको थियो ।