कमला बचाउ अभियान सफल भए तराईवासी धन्य हुनेछ : प्रदेश प्रमुख परियार

न्यूज ब्यूरो, जनकपुरधाम । प्रदेश नं. २ का प्रदेश प्रमुख तिलक परियारले कमला बचाउ अभियान सफलता पूर्वक सम्पन्न भए तराई मधेशका जनता धन्य हुने बताएका छन् ।

उनले ‘कमला बचाउ’ अभियानलाई सम्पन्न गर्न निर्णायक शक्ति जनतामा रहेको औल्याउँदै अभियान सम्पन्न भए धनुषा र सिरहावासीका साथै तराई मधेशका जनताको पौराणिक अस्तित्व समेत जीवित रहने औल्याए । कमला बचाउ अभियानको प्रथम वार्षिकोत्सव तथा कार्तिक पूर्णिमाको अवसरमा शहिदनगर नगरपालिका र सबैला नगरपालिकाको बीचमा पर्ने रामघाटमा प्रमुख अतिथिको आसनबाट सम्बोधन गर्दै प्रदेश प्रमुख परियारले कमला बचाउ अभियानको लागि जनता जनार्दन जागरुक हुनु आवश्कता औल्याए ।

‘महाभारत पर्वत हुंदै कमला तराई–मधेश प्रबेश गरेको छ । कमला नदीको आफ्नै ऐतिहासिक पहिचान र महत्व छ । कमला जहाँ जहाँ जान्छिन त्यहाँ सुन फल्छ । यहाँ सिन्धुलीदेखि पहाड हुँदै तराईको सिरहा र धनुषा जिल्ला छोएर भारतसम्म जानुभएको छ, जहाँ अन्नको भण्डार उहाँकै आगमनले पनि भएको छ । केन्द्र र प्रदेश–२ सरकार मिलेर कमला बचाउ अभियानलाई संयुक्त रुपमा सफल बनाउन आफूले पहल गर्ने प्रतिबद्धता जनाउँदछु ।'- उनले भने ।

कमला बचाउ अभियानलाई राष्ट्रिय अभियानको रुपमा अगाडि बढाउन आफू संघीय सरकार समेतलाई आग्रह गर्ने बताउँदै कार्यक्रममा भारतबाट आएका जल पुरुष, जल संरक्षण अभियानकर्ता र रामायण सर्किटका प्रतिनिधिलाई धन्यवाद सहित स्वागत गरे । उनले कमला नदीलाई बचाउको एउटै मात्र आसा कमला बचाउ अभियान रहेकोले यस अभियानमा सबैले साथ दिनुपर्ने जीकिर गरे ।

मँगलबार सम्पन्न कमला बचाउ अभियानको प्रथम वार्षिकोत्वसको अवसरमा व्यवस्थापन पक्षबाट बोल्दै शहिदनगर नगरपालिकाका मेयर (कान्छो मेयर ) उदय कुमार बरबरियाले कमला बचाउ अभियानलाई राजनीतिक रुप नदिएर सबैले एक जुट भई एक अभियानीको तहबाट सहयोग गर्न आग्रह गरे । उनले आफ्नो नगरपालिकाको केही भाग पवित्र कमला नदी छोएकोप्रति गौरवान्वित महसुस गर्दै कमला बचाउ अभियानको लागि गर्नुपर्ने हरेक सहयोगको लागि शहिदनगर नगरपालिका तत्पर रहेको औल्याए ।

अभियानको बीचदेखि नै अभियानमा सक्रिय भएका मेयर बरबरियाले शहिदनगरको केही भाग कमला नदी छोएको भन्दै त्यसको पौराणिक इतिहास र अस्तित्व रक्षाको लागि स्थानीय सरकारबाट हुने हरसम्भव सहयोग गर्ने प्रतिवद्धता समेत जाहेर गरे । कमला नदीमा बालुवाको सतह दिनानुदिन बढदै गएकोप्रति चिन्ता व्यक्त गर्दै उनले पर्यावरण रक्षार्थ हेतु समेत कमला बचाउ अभियानीलाई आफ्ना नगरका जनताले साथ दिने जनाउँदै सबै पक्ष मिलेर यस अभियानलाई सफल बनाउन आग्रह गरे ।

कमला बचाउ अभियानका सँस्थापक एवम् अभियानी विक्रम यादवको अध्यक्षता एवम् प्रदेश प्रमुख तिलक परियारको प्रमुख आतिथ्यमा सम्पन्न भएको प्रथम वार्षिकोत्सव समारोहमा भारतबाट आएका जलपुरुषहरुले अभियानी यादवको खुलेर प्रशंसा गरे । पर्यावरण बचाउको लागि अभियानी विक्रम यादबले उठाएको बिडा सराहनीय रहेको भन्दै उनीहरुले सराहना गरे । कमला बचाउ अभियानका संयोजक यादवलाई लाई भारतबाट पर्यटन मन्त्रालय भारत सरकार रामायण पथका अध्यक्षबाट तथा सरयुग नदी बचाओं अभियानका संयोजक पवन कुमार सिंह द्धारा सरयुग नदिको जल माटो सहित मायाको चिनो सहित शुभकामना पत्र प्रदान गरी अभियानलाई प्रथम बार्षिक महोत्सवको शुभकामना सहित प्रसंसा गरेका थिए ।

वार्षिकोत्सव समारोहमा विशिष्ट अतिथिको आसनबाट सिरहाका प्रमुख जिल्ला अधिकारी गोपाल अधिकारी र धनुषाका प्रमुख जिल्ला अधिकारी प्रदीपराज कनेलले समेत कमला बचाउ अभियानको लागि प्रशासनीक रुपमा पहल गर्ने प्रतिवद्धता जनाए । सो कार्यक्रममा सुरक्षा निकायका व्यक्तित्वहरुले पनि आ आफ्ना धारणा राखेका थिए । सो क्रममा कमला नगरपालिकाका मेयर राम उदगार गोईतले कमला नदीकै ईतिहासलाई मध्यनजर गर्दै नगरपालिकाको नाम समेत कमला राखेकोप्रति गौरव प्रकट गरे । उनले कमला नदीको अस्तित्व बचाउनको लागि नगरपालिकाबाट हुने सबै सहयोगको प्रतिवद्धता जाहेर गरे ।

समारोहमा प्रदेश नं. २ सरकारका आन्तरिक मामिला तथा कानुन मन्त्री ज्ञानेन्द्र कुमार यादव, भूमि व्यवस्था, कृषि तथा सहकारी राज्य मन्त्री योगेन्द्र राय यादव, भारतका जलपुरुषगण, जल संरक्षण अभियानी गण, गान्धी पिस फाउण्डेशनका लालबहादुर सिँह राणा, निम, तुलसी पिपल अभियानी डा. धर्वेन्द्र कुमार, शहिदनगर नगरपालिकाका निमित्त प्रमुख प्रशासकीय अधिकृत नन्द कुमार झा, लेखा अधिकृत लोक बहादुर नेपाली, कम्पयुटर अपरेटर विष्णुदेव यादव, जिन्सी शाखा प्रमुख सुदिप भट्टराई, पोषण प्रमुख रुपेश विराजी, सिरहा नगरपालिकाका मेयर अशेश्वर प्रसाद यादव, प्रदेश नं. २ का वनमन्त्री राम नरेश राय, सिरहा कर्जन्हा नगरपालिकाका मेयर गंगा पासवान, बिष्णुपुर गाउँपालिकाका अध्यक्ष जागेश्वर यादव सहित कमला छेउछाउका विभिन्न नगरप्रमुख र प्रतिनीधिहरुको सहभागिता रहेको थियो ।

प्रथम वार्षिकोत्सवको अवसरमा कमला स्नानको लागि रामघाट आएका श्रद्धालुहरुको लागि कपडा फेर्ने घेरा, अस्थायी शौचालय, खानेपानी सहित भोजनको समेत व्यवस्था गरिएको थियो । शहिदनगर नगरपालिकाको व्यवस्थापनमा भएको सो कार्यक्रममा जल संरक्षण अभियानी, कमला बचाउ अभियानीहरुलाई सम्मानपत्र समेत प्रदान गरिएको थियो । भारतीय जल अभियानी सहित विशिष्ट व्यक्तित्वहरुलाई अभियानका सँयोजक विक्रम यादव, शहिदनगर नगरपालिकाका मेयर उदय कुमार बरबरियाले मायाको चिनो स्वरुप कमला नदीको तस्विर प्रदान गरेका थिए ।