भारतसँग सम्बन्ध नबिग्रिने गरी नक्सा विवाद सुल्झाउनुपर्छ : उपेन्द्र यादव

न्यूज ब्यूरो, जनकपुरधाम । समाजवादी पार्टीका अध्यक्ष तथा नेपाल सरकारका उपप्रधान एवं स्वास्थ्य जनसंख्यामन्त्री उपेन्द्र यादवले सीमा विवादका विषयमा नेपाल सरकारले कुटनीतिक पहलबाट समस्याको निकास दिनुपर्ने बताएका छन् ।

सप्तरीको राजविराजमा आइतबार सञ्चारकर्मीसंग कुरा गर्दै उनले नेपाली जग्गा भारतले अतिक्रमण गरेको सन्दर्भमा दुबै देशबीच कुटनीतिक रुपमा हल गर्न पहल हुनुपर्ने धारणा राखे । उनले कागले कान लग्यो भनेर दौडनु सरह नै अहिले यो विषय रहेको दावी गरे ।

उपप्रधानमन्त्री यादवले समस्या के कसरी भएको हो भन्ने विषय यकिन गरेर दुबै देशको सम्वन्ध नबिग्रने गरी कुटनीतिक पहल गरेर निकास निकाल्नु नै उचित हुने बताए । भारतले जारी गरेको नयाँ राजनीतिक नक्सामा नेपाली भूभाग कब्जा गरिएको भन्दै नेपालको विभिन्न स्थानमा विरोधका कार्यक्रमहरु हुँदै आएको छ ।