स्कूल तोडेर सडकमै बनाइएको वडा कार्यालय उपर डोजर चलाइयो

न्यूज ब्यूरो, जनकपुरधाम । कुनै बेला विद्यालयको भवन र पर्खाल तोडेर सडकमै निर्माण गरिएको वडा कार्यालय उपर शुक्रबार डोजर चलाइएको छ ।

जनकपुरधाम उपमहानगरपालिका वडा नं. २१ को वडा कार्यालयमाथि डोजर चलाइएको हो। विद्यालयको भवन र पर्खाल समेत मासेर सार्वजनिक सडकमै बलपूर्वक बनाइएको वडा कार्यालय सडक डिविजन कार्यालय जनकपुरले स्थानीय प्रशासनको सहयोगमा तोडेका छन् । वडाध्यक्षले पैसा र पावरको आडमा आफ्नो व्यक्तिगत ईगो सटिस्फाई गर्न विद्यालयको भवन समेत भत्काएर वडा कार्यालय निर्माण गरेपनि आज सडक डिविजन कार्यालयले त्यसलाई पनि भत्काएको छ ।

सडकमै वडा कार्यालय रहेको तथा विद्यालयको भवन र पर्खाल समेत भत्काएर वडा कार्यालय खडा गरेपछि स्थानीयहरुले विभिन्न चरणमा आन्दोलन समेत गरेका थिए । त्यतिबेला जनकपुरधाम उपमहानगरपालिकाका मेयर लालकिशोर साह र वडाध्यक्ष रामेश्वर महासेठले पदको आडमा पनि स्थानीय नागरिकलाई वास्ता भने गरेका थिएनन् । सडक डिविजन कार्यालयले त्यही नागरिकको निवेदन उपर कारवाही गर्दै डोजर चलाएर वडा कार्यालय भत्काएको स्थानीय शम्भु निर्दोषी (झा) ले बताएका छन् ।

सडकमै निर्माण गरिएको वडा कार्यालयको पुरानो तस्विर

निर्माणाधीन जनकपुर लोहारपट्टी सडकखण्डमै पर्ने वडा कार्यालय बचाउन झण्डै डेढ वर्षअघि वडाध्यक्ष रामेश्वर महासेठको संलग्नतामा सडकको दक्षिणपट्टि रहेको राजर्षि जनक माध्यमिक विद्यालयको घर तथा पर्खाल भत्काइएको थियो । त्यसै बेलादेखि त्यहाँ विवाद चल्दै आएको थियो । विद्यालयको कक्षाकोठा र पर्खाल भत्काएपछि विद्यार्थीले सडकमै समेत पढेर विरोध गरेका थिए । त्यतिबेला विद्यार्थी आन्दोलनलाई पनि जनप्रतिनीधिहरुले वास्ता भने गरेका थिएनन् ।

शुक्रबार विहान वडा कार्यालय भत्काउ त्यहाँ प्रशासन र डोजर सँगै पुगेपछि वडाध्यक्ष पक्षधर र स्थानीवासीबीच गरमागरमी समेत भएको थियो । मोटो सँख्यामा जनपद, शसस्त्र प्रहरी परिचालन गरिएर वडा कार्यालय भत्काइएको हो । वडा कार्यालय भत्काइएपनि स्थानीयहरु खुसीयाली मनाएका छन भने उनीहरुले सत्यको जीत भएको पनि टिकाटिप्पणी गरेका छन् ।