रविराजको पहिलो छठ गीत 'आबे ठेकुवाके याद' सार्वजनिक

न्यूज ब्यूरो, जनकपुरधाम । नेपाल लोकस्टारबाट एकाएक चर्चामा आएका लोक गायक रविराज साहको छठ गीत सार्वजनिक गरिएको छ ।

तराई मधेशमा निष्ठा र महान पर्वको रुपमा मनाइने छठ पर्वको अवसर पारेर गायक रविराजको आवाजमै ‘आबे ठेकुवा याद’ बोलको गीत सार्वजनिक गरिएको हो । धार्मिक एवम् मार्मिक प्रकारले स्वर दिइएको त्यस गीतमा आनन्द अस्तित्वले शब्द सजाएका हुन् ।

अबध मिडिया ग्रुप र पुरनेन्दु प्रोडक्सनको प्रस्तुतिमा रहेको आबे ठेकुवाके इयाद दर्शकहरुले खुबै मन पराएका छन् । युट्यूब च्यानल मार्फत् सार्वजनिक गरिएको गायक साहको गीत यो समयमा लोकप्रिय मानिएको छ ।

नेपाल लोकस्टारबाट बाहिरिएपछि उनलाई तराई मधेशको विभिन्न जिल्लामा विभिन्न रुपले सम्मान गर्ने क्रम जारी छ । स्वरको धनी मानिएका रविराज साहले छठको सिजनमा नयाँ छठी गीत सार्वजनिक गरेपछि गीतलाई चौतर्फी मन पराइएको छ ।

निर्देशक पुरनेन्दु झाको निर्देशनमा तयार गरिएको उक्त गीतको भीडियो भर्सनमा आशिश गुप्ता, राज सरार्फ र सुजित सिंहले पनि सघाएका छन् । चन्दुज स्टुडियोज प्रालि जनकपुरधाममा सम्पादन गरिएको सो गीतलाई तराई मधेशको संस्कृति उपरको गहना मानिएको छ ।