नेपाल लोकस्टारको ग्राण्ड फिनाले आज, 'रविराज'को पनि धमाका !

न्यूज ब्यूरो, जनकपुरधाम । नेपालकै सबैभन्दा ठूलो मौलिक सिंगिन रियालिटी शो ‘नेपाल लोकस्टार’ को आज (शुक्रबार) ग्राण्ड फिनाले हुँदैछ ।

भृकुटीमण्डपमा हुन लागेको ग्राण्ड फिनालेबाट नेपालले नेपालकै पहिलो उत्कृष्ट मौलिक आवाज पाउनेछ । फिनालेमा रामकुमार नेपाली (रामेछाप), शनि विश्वकर्मा (रोल्पा), चेतन गोतामे (स्याङ्जा) र बिनोद दनुवार (उदयपुर) छन् ।

गएको शनिबार दिउँसो १२ बजेबाट शुक्रबार दिउँसो १२ बजेसम्म स्रोता तथा दर्शकले गरेको भोटको आधारमा विजेता घोषित हुनेछन् । नेपाल लोक स्टारमा निर्णायकको रुपमा वरिष्ठ कलाकार तथा गायक जयनन्द लामा, गायक रामजी खाँड, सुनिता दुलाल र वरिष्ठ संगीतकार बीबी अनुरागी रहेका छन् ।

अडिसनदेखि विभिन्न राउण्डहरु पार गर्दै नेपाल लोक स्टार को ग्राण्ड फिनालेमा ४ प्रतिस्पर्धी पुग्न सफल भएका हुन् । आज हुन लागेको ग्राण्ड फिनालेमा लोकस्टारको टप ५ को फाईनलसम्म पुगेर आउट भएका रविराज साहको पनि प्रस्तुति रहनेछ । लोकस्टारको फाईनलको मुख नजिकैबाट बाहिरिन पुगेका रविराज साह लोकस्टारमै सर्वाधिक चर्चित र मन पराइएका आवाज हुन् ।

नेपाल लोकस्टारको विजेताले ५० लाख, दोस्रोले २५ लाख, तेस्रोले १० लाख र चौथो अर्थात् सान्त्वना हुनेले ५ लाख प्राप्त गर्नेछन् ।