आलमको आज तेस्रो पटक म्याद थपिँदै, अनुसन्धान करिब अन्तिम चरणमा

न्यूज ब्यूरो, जनकपुरधाम । बम विस्फोट र इँटाभट्टामा हालेर व्यक्ति हत्या गरेको अभियोगमा पक्राउ परेका कांग्रेस सांसद मोहम्मद अफताब आलमलाई तेस्रो पटक म्याद थप्ने तयारी गरिएको छ ।

प्रहरीले शुक्रबार (आज) तेस्रोपटक म्याद थप गर्न अदालत लैजान लागेको हो । दुईपटक दिइएको समयमा अनुसन्धानले पूर्णता नपाएपछि आज तेस्रोपटक म्याद थप गर्न लैजाने तयारी जिल्ला प्रहरी कार्यालय रौतहटका डिएसपी नविन कार्कीले जानकारी दिए ।

७ दिन म्याद थप गरिदिन अदालतसमक्ष आग्रह गर्ने तयारी भएको सरकारी वकिलको कार्यालय स्रोतले जनाएको छ । कांग्रेस सांसद तथा पूर्वमन्त्री आलम असोज २६ गते पक्राउ परेका थिए ।

प्रहरीले अनुसन्धान करिब अन्तिम चरणमा पुर्याएको छ । प्रत्यक्षदर्शी र पीडितहरुले खुलेर घटनाबारे बताएकाले अनुसन्धानमा केहि सहजता आएको प्रहरीले जनाएको छ । जिल्ला प्रहरी कार्यालय रौतहटले १२ वर्षअघिको घटनासम्बन्धमा बयानका लागि नेपाल प्रहरीका दुई बहालवाला डीएसपीलाई झिकाएको छ ।

पूर्वमन्त्री आलमले पहिलो संविधान सभाको निर्वाचनको बुथ कब्जा गर्न केहि व्यक्तिलाई बम बनाउन लगाएका थिए । बम बनाउने क्रममा अचानक विस्फोट भएपछि केहिको घटनास्थलमै मृत्यु भएको थियो भने केहि घाइते भएका थिए । घाइते भएकाहरुलाई उनले इट्टा भट्टामा हालेर जिउँदै जलाई हत्या गरेको उनीमाथि आरोप छ ।