शिक्षक पेशालाई मर्यादित बनाऔं : मेयर बरबरिया

न्यूज ब्यूरो, जनकपुरधाम । धनुषाको शहिदनगर नगरका मेयर उदय कुमार बरबरिया यादवले शिक्षकहरुलाई आफ्नो पेशालाई मर्यादित बनाउन आग्रह गरेका छन् ।

समस्या भएको खण्डमा छलफलको माध्यमबाट समस्या समाधान खोजिन सक्ने बताउँदै उनले शहिदनगरको शिक्षा समिति सहित नगरभित्र कार्यरत शिक्षकहरुलाई सबै तवरबाट पेशागत मर्यादा कायम गर्न आग्रह गरेका हुन् । विहिबार नेपाल राष्ट्रिय शिक्षक संगठन र एकीकृत अखिल नेपाल शिक्षक संगठनको संयुक्त आयोजनामा गरिएको शुभकामना आदानप्रदान कार्यक्रममा विशिष्ट अतिथिको आसनबाट बोल्दै मेयर बरबरियाले नगरको शिक्षालाई गुणस्तरीयता प्रदान गर्न शिक्षकको महत्वपूर्ण भूमिका रहेको औल्याए ।

राष्ट्रिय शिक्षक संघका जिल्ला अध्यक्ष योगेन्द्र प्रसाद महतोको अध्यक्षता एवम् शिक्षक महासंघका केन्द्रीय सदस्य दिनेश रायको प्रमुख आतिथ्यमा सम्पनन भएको चियापान तथा शुभकामना आदान प्रदान कार्यक्रमको दौरान मेयर बरबरियाले अँध्यारोबाट उज्यालो तर्फ बाटो देखाउने गुरुको रुपमा रहेको शिक्षकहरुले आफ्नो पेशागत मर्यादा भन्दा तल झरेको कारण पनि वर्तमान अवस्थामा देशका कर्णाधारहरुको अवस्था क्षतविक्षत भएको बताए ।

उनले भने, - "देशको कर्णाधार निर्माण गर्ने सुत्र हुन शिक्षक, देशका कर्णाधारहरुलाई नयाँ जीवन र जन्म दिने सँकल्पित गुरुकुल हुन शिक्षक, तर विगत केही समयदेखि राजनीतिक उथलपुथलसँगै शिक्षक पेशामा पनि मर्यादको गिराबट भएको देखिएको छ । राजनीतिक उतारचढावले शिक्षकहरुलाई तटस्थ बस्नुपर्छ । नगरस्तरदेखि, जिल्लास्तरसम्मका शिक्षकहरु होस वा केन्द्रीय कुनै समितिका पदाधिकारी होस्, त्यो पहिले कोई एक शिक्षक हुन भनेर आफ्नो मर्यादा बुझनुपर्छ । र शिक्षकलाई हाम्रो समाजमा गुरु र भगवानकै दर्जा दिएको छ भनेर नभुल्नुस ।"

सो शुभकामना आदानप्रदान कार्यक्रममा अतिथिहरुमा एकिकृत अखिल नेपाल शिक्षक संघका अध्यक्ष धर्मेन्द्र यादव धर्मेन्द्र यादव , नेपाल शिक्षक संघका अध्यक्ष रामस्नेही यादव , प्रदेश प्रतिनिधि , जिल्ला प्रतिनिधि , विभिन्न शिक्षक फोरम प्रतिनिधिहरु लगायत संगठनमा आबद्ध शिक्षक शिक्षिकाहरुको उपस्थितिमा बक्ताहरुले शिक्षक हकहितका बारेमा आ आफ्नो धारणाहरु राख्दै शुभकामना आदानप्रदान गरेका थिए ।