यातायात लहानका हाकिम 'भट्टराई' कानुनलाई धज्जिया उडाएर अड्डा जमाए

न्यूज ब्यूरो, सिरहा । यातायात व्यवस्था कार्यालय लहानका निमित्त कार्यालय प्रमुख मीन बहादुर भट्टराई कानुनलाई धज्जिया उडाउँदै बलजफ्ती कार्यालयमा हाजिरी गरेको पाइएको छ ।

महिनामा एक आध दिन मात्र कार्यालय धाउने निमित्त प्रमुख भट्टराई कानुन मिचेर हाजिरी गर्नुका साथै उनको समायोजन प्रदेश नं. १ मा भएपनि बलजबरदस्ती रुपमा साविककै कार्यालयमा अडान गरी बसेका छन् । भट्टराईले निजामति सेवा ऐनलाई सोझै मिचेर दैनिक हाजिर रजिष्टरमा असोज १६ र १७ गते हस्ताक्षर गरेर बिचमा खाली छोडदै एकै पटक २९ गतेको हस्ताक्षर गरेका छन् । उनी असोज २८ गते नै २९ गतेको लागि अर्थात एक दिन अघि नै हाजिरीमा हस्ताक्षर गरेको गोप्य स्रोतको दाबी छ ।

ऐन नियम अनुसार भुलबस अर्को महिनाको कुनै गतेमा हाजिर भएको खण्डमा आफु भन्दा माथिलो निकाय संग हाजिरको प्रमाणित गर्नु पर्ने कानूनी पर्वद्धान रहेपनि निमित्त प्रमुख भट्टराईले त्यस्तो कुनै कानुनी प्रावधान नै नअपनाई बलजबरदस्ती बसेका हुन् । भट्टराईले समायोजनको लागि दिएको आवेदन अनुसार समान्य प्रशासन मन्त्रालयको गत असार ५ गतेको निर्णय अनुसार प्रदेश नं। १ मा समायोजन हुन पत्राचार गरेपनि अहिलेसम्म हाजिर नभई बलपूर्वक यातायात व्यवस्था कार्यालय लहानमा बसेका हुन् । उनलाई कर्मचारी समायोजन ऐन २०७५ को दफा ७ बमोजिम प्रदेश नं. १ मा समायोजन गरेपनि हालसम्म साबिककै कार्यालयमा अड्डा जमाएर बसेका हुन् ।

भट्टराईलाई समायोजन पछि रमाना दिनको लागि भौतिक पूर्वाधार मन्त्रालय प्रदेश नं. २ ले समेत गत असोज ५ गते यातायात कार्यालय लहानलाई पत्र काट्दै तत्कालै रमानाको लागि भनेपछि भौतिक पूर्वाधार मन्त्रालयको आदेशलाई समेत अटेरी गरेको देखिएको छ । उनलाई मन्त्रालयले असोज ३० गते भित्र रमाना दिएर समायोजन भएको ठाउँमा पठाउन पत्राचार गरेपनि त्यहाँबाट नगएपछि अन्य कर्मचारीलाई दुविधा भएको बुझिएको छ ।

गत भदौ १५ गतेमा संघीय मामिला तथा समान्य प्रशासन मन्त्रालयले समेत पत्राचार गर्दै समायोजनमा परेका कर्मचारीहरुलाई समायोजन भएको ठाउँमा हाजिर हुन पठाउने गरी पत्र काटेपनि त्यसलाई अटेरी गर्दै भट्टराई यातायात कार्यालय लहानमै बसेर कार्य गरिरहेका छन् । गत भदौ १५ गते नै काटिएको पत्रमा २१ दिन भित्र समायोजन भएको ठाउँमा हाजिर हुन भनिएपनि हालसम्म उनी साबिककै कार्यालयमा बलपूर्वक बस्दै निजामति ऐनलाई धज्जियाँ उडाउँदै बसेका हुन् ।

यता, भौतिक पूर्वाधार मन्त्रालय प्रदेश नं. २ का सचिव पुष्कारनाथ घिमिरेले समायोजन भएको ठाउँमा जानुपर्ने प्रतिक्रिया दिएका छन् । बुधबार बेलुका न्यूज ब्यूरोसँग कुराकानी गर्दै सचिव घिमिरेले संघबाट आएको पत्र प्राप्त भएलगत्तै पुन पत्र काटिने जानकारी दिए । उनले भने, 'हामीलाइ संघबाट समायोजनको पत्र आएको छैन, र नआएपनि हामी त्यसबारे बुझेर पुनः पत्र काटछौं, समयमै नगए कारवाही गर्छौ । यदि हाजीरी एकैदिनमा सबै दिनको गरेको पाइयो भने हामी कारवाहीको लागि प्रक्रिया अघि सार्छौ, तर समायोजन भएको ठाउँमा जानुपर्ने हुन्छ ।'

गत २०७५ फागुन ५ गतेमा संघमा समायोजन भएपनि फेरी २०७६ साल असार ५ गतेमा सँशोधन गराएर प्रदेश नं. १ मा समायोजन भएका भट्टराई पुनः पनि प्रदेश नं. १ मा यातायात कार्यालय नपाएपछि पुनः लहानमै बस्ने योजना बनाएको बुझिएको छ । यसका साथै, निमित्त प्रमुख भट्टराईलाई यसबारे सोधपुछ गर्दा आफूलाई किन सोधेको भन्दै फोट काटेका थिए ।