गायक 'रविराज साह'लाई प्रदेश सरकारको सम्मान, ५ लाख दिने

न्यूज ब्यूरो, जनकपुरधाम । नेपाल लोकस्टारका प्रखर गायक रविराज साहलाई प्रदेश २ सरकारले सम्मान गरेको छ ।

प्रदेश २ का मुख्यमन्त्रीसहित मन्त्रीहरुले बुधबार बिहान मुख्यमन्त्रीको कार्यालयमै बालाएर सम्मान गरेका हुन् । मौलिक सिंगिङ रियालिटी शो नेपाल लोकस्टारबाट मधेशको लोक गीतलाई रविराजले राष्ट्रिय स्तरमा चिनाएको भन्दै प्रदेश सरकारले सम्मान गरेको हो ।

नेपाल लोकस्टारबाट भोटको कारण बाहिरिएपनि रविराजमा उच्च सम्भावना भएको भन्दै प्रदेश सरकारले प्रोत्साहन स्वरुप पाँच लाख दिने घोषणासमेत गरेको छ । सो क्रममा मुख्यमन्त्री लालबाबु राउतले रविराजले प्रदेशको नाम उँचो गरिरहेको भन्दै निकट दिनमा चाहिने सहयोग गर्ने प्रतिवद्धता गरे । उनले रविराजको उत्तरोतर प्रगतिको कामनासमेत गरे ।

रविराजलाई सम्मान गर्न मुख्यमन्त्री कार्यालयमा मुख्यमन्त्री लालबाबु राउतसहित प्रदेशका आर्थिक, मामिला तथा योजनामन्त्री विजय यादव, उद्योग, पर्यटन, वन तथा वातावरणमन्त्री रामनरेश राय, समाजिक विकासमन्त्री नवलकिशोर साह, समाजसेवी बैद्यनाथ साह लगायतका सहभागी थिए । मधेशको प्रतिभाका लागि प्रदेश सरकारको यो तारिफयोग्य कदम भएको भन्दै यसको प्रशंसा गरिएको छ ।

लोकस्टारबाट बाहिरिएपछि जन्मथलो मधेश आएका रविराजलाई मधेशका विभिन्न जिल्लामा सम्मानको क्रम जारी छ । यसअघि जनकपुरमै रविराजलाई भव्य सम्मान गरिएको थियो । गायक साह प्रदेश २ सरकारका आर्थिक, मामिला तथा योजनामन्त्री विजय यादव, प्रदेश सांसद रामअशिष यादव, प्रसिद्ध गायक सुनिल मल्लिक, ललित कामत, चर्चित हास्य कलाकार रामनारायण ठाकुर लगायतका विशिष्ट व्यक्तित्वका हातबाट सम्मानित भएका थिए ।

यस्तै, जनकपुरधाम उपमहानगरपालिकाले समेत रविराजलाई कार्यालयमै बोलाएर सम्मान गरेका छन् । शुभचिन्तक भेटघाटको लागि जनकपुरधाम पुगेका रविराज विश्व प्रसिद्ध जानकी मन्दिरमा आयोजित एक सांस्कृतिक कार्यक्रममा सरिक भए । कार्यक्रममा विशिष्ट अतिथिको रुपमा सहभागी भएका रविराज आफ्नो प्रस्तुति दिएर दर्शकलाई झुमाउँदै मन्त्रमुग्ध बनाएका थिए ।

नेपाल लोकस्टारको अडिसनबाट २२ हजार प्रतियोगीलाई पछि पार्दै टप ६ सम्म पुगेका रविराज टप ५ को फाईनलबाट झिनो भोट कमका कारण बाहिरिएका थिए । उनी लोकस्टारबाट बाहिरिएपनि नेपालका विभिन्न समुदायको गीत गाएर सबैको मनमस्तिष्कमा बस्न सफल भएका छन् ।

यतिबेला मधेशमा रहेका रविराज कार्तिक ८ गते हुन लागेको नेपाल लोकस्टारको फाईनलको तयारीको लागि उनी अब केहिदिनपछि काठमाडौं जानेछन् । नेपाल लोकस्टारको फाईनलमा रविराजको पनि प्रस्तुति रहनेछ ।