राजपा सांसद साह पक्राउ, जनकपुर विमानस्थलमा सुरक्षा व्यवस्था कडा

न्यूज ब्यूरो, जनकपुरधाम । जनकपुरधाम विमानस्थलमा बुद्ध एयरको काउण्टरमा तोडफोड गरेको अभियोगमा राजपा सांसद प्रमोद कुमार साह पक्राउ गरेका छन् ।

सांसद साहविरुद्ध जिल्ला प्रहरी कार्यालय धुनषामा सोमबार उजुरी परेसँगै उनलाई महानगरीय अपराध अनुसन्धान महाशाखाका विशेष टोलीले काठमाडौं विमानस्थलबाट पक्राउ गरेको हो । उनलाई आजै जिल्ला अदालत धनुषामा पेस गरिने जनाइएको छ ।

सर्लाहीबाट निर्वाचित सांसद साहले सोमबार जनकपुर विमानस्थलस्थित बुद्ध एयरको काउन्टरमा फ्लाईट डिले भएको भन्दै तोडफोड गरेका थिए । एकजना मुटुका विरामी विहानैदेखि प्लेन कुरिरहेको र नआएपछि विरामीको अवस्था नाजुक बन्न थालेपछि आफू आक्रोशित बनेको सांसद साहको भनाई छ ।

सांसद साह पक्राउ परेलगत्तै जनकपुर विमानस्थलको सुरक्षा व्यवस्था कडा पारिएको छ । विमानस्थलमा अहिले व्यापक प्रहरी परिचालन गरिएको छ ।