आलमलाई सातदिनको म्याद थप, यसरी घाइतेलाई जिउँदै जलाइएको थियो !

न्यूज ब्यूरो, रौतहट । बमकाण्डको आरोपमा पक्राउ परेका पूर्वमन्त्री अफताब आलमलाई अनुसन्धान गर्न रौतहट जिल्ला अदालत गौरले सात दिनको म्याद थपेको छ ।

आइतबार पेश गर्नेगरी न्यायाधीश चित्र बहादुर गुरुङको पाच नम्बर इजलासले आलमसँग अनुसन्धानको लागि म्याद थप गरेको हो । प्रहरीले १५ दिनको म्याद मागेको तर अदालतले पहिलो चोटि ७ दिनको म्याद दिएको रौतहट प्रहरी प्रवक्ता नवीन कार्कीले बताए ।

नेपाली कांग्रेसबाट रौतहट क्षेत्र नम्बर २ बाट प्रतिनिधिसभामा विजयी आलमलाई बितेको आइतबार रौतहट प्रहरीले पिप्रा भगवानपुरबाट नियन्त्रणमा लिएका थिए । पहिलो संविधान सभाको अघिल्लो दिन ०६४ चैत्र २७ गते तत्कालिन राजपुर फरहदवा गाबिस–४ स्थित आफनै गोठमा बम बनाउने क्रममा बिस्फोट हुदा तीन जना भन्दा बढिको मृत्यु भएको र सबै घाइतेलाई समेत आलमले इटा भट्टामा फाली मारेको आरोप आलम माथी छ ।

दुई पटक रौतहट पार्टी सभापति हुँदै नेपाली काग्रेसका केन्द्रिय सदस्य रहेका काका शेष ईद्रिसको मृत्युपछि राज्य सतामा रहेका आलम नेपाली काग्रेसबाट ०५४ सालको प्रतिनिधिसभा उपनिर्बाचन, ०५६ को प्रतिनिधि सभाको आबधिक निर्बाचन, ०६४ सालको संबिधान सभा सदस्य, ०७४ सालको प्रतिनिधिसभा सदस्यमा निर्वाचित भएका थिए ।

आफ्ना नेतालाई पक्राउ गरेपछि आइतबार, सोमबार गौरसहित जिल्लाको विभिन्न ठाउँमा समय समयमा सामन्य झडप र नाराबाजी भएतापनि मंगलबार अदालत वरिपरि समर्थका भिड देखिएन । कडा सुरक्षा घेराबीच बिना हटकडी आदालत पेश गरिएको आलमले आफुले कानुनलाई सघाउने बताए ।

यसकारण पक्राउ परे आलम
२०६४ मा भएको पहिलो संविधानसभा चुनावको अघिल्लो रात चैत २७ मा भएको बम विस्फोटमा घाइते भएका युवालाई जलाएर हत्या गरेको घटनाका आरोपी उनलाई प्रहरीले पक्राउ गरेको हो ।

पूर्वमन्त्री शेख इद्रिसको पुरानो घरमा बम विस्फोट हुँदा पिन्टु भन्ने २४ वर्षीय त्रिलोकप्रताप सिंह र अर्का २२ वर्र्षका ओसी अख्तर ज्यान गएको थियो । राजपुर गाउँ नजिकैको इँट्टाभट्टामा जलाएर प्रमाण नष्ट गरेको भन्दै २०६५ वैशाख ९ मा पिन्टुका बाबु श्रीनारायण सिंह र ओसी अख्तरकी आमा रोक्साना खातुनले सांसद आलम, उनका भाइ महताबसहित मोबिन आलम, शेख भदई र शेख सवेजविरुद्ध किटानी जाहेरी दिएका थिए ।

पीडित परिवारको जाहेरीपछि २०६५ असार ३० मा महान्यायाधिवक्ता कार्यालयले रोक्साना खातुन वादी रहेको मुद्दामा कोहीमाथि मुद्दा नचलाउने निर्णय गरेको थियो । महान्यायाधिवक्ताको कार्यालयले मुद्दा नचलाउने निर्णयपछि पीडित श्रीनारायण सिंहले सर्वोच्च अदालतमा पुनरावेदन गरेका थिए । सर्वोच्चले २०६९ जेठ १६ मा मुद्दाको गम्भीरतापूर्वक अनुसन्धान गरी ‘प्रचलित कानुनबमोजिम’ कारबाही गर्ने आदेश दिएको थियो ।

अदालतको आदेश नमानेको भन्दै पीडित पक्षले २०७३ मा जिल्ला प्रहरी कार्यालय रौतहटविरुद्ध मानहानि मुद्दा दर्ता गराएका थिए । निर्देशनालयले २०७५ चैत ८ मा जिल्ला प्रहरी कार्यालयलाई ताकेता गर्दै मुद्दाको अनुसन्धान गर्न पत्राचार गरेपछि घटनाका मुख्य आरोपी सांसद आलमलाई प्रहरीले पक्राउ गरेको हो । सर्वोच्चको आदेशअनुसार आलमलाई कर्तव्य ज्यान मुद्दामा अनुसन्धान गर्न पक्राउ गरिएको डीएसपी कार्कीले जानकारी दिए । अन्य आरोपी फरार छन् ।

बमकाण्ड घटना के हो ?
२०६४ को पहिलो संविधानसभा चुनाव चैत्र २८ गते हुँदै थियो । अघिल्लो दिन २७ गते राति राजपुर फरदवाकोमा बम विस्फोट भयो । चुनावमा बुथ कब्जा गर्न ल्याइएका बम विस्फोटन भएको र सोही विस्फोटनमा करिब दुई दर्जन मानिस घाइते भएको दाबी गरिएको छ । आपराधिक गतिविधिमा संलग्न धेरै भारतीयलाई पैसा दिएर प्रयोग गरेको उनीमाथि आरोप छ ।

घटना लुकाउन विस्फोटमा मारिएका तथा घाइते भएकाहरूलाई गाउँ नजिकैको आफन्तको इँटाभट्टामा जलाएको पीडित पक्षको दाबी छ । घटनामा आफन्त मारिएको भन्दै यमुनामाई गाउँपालिका–४ का सिंह र खातुनले नेता आलमसहित ५ जनाविरुद्ध प्रहरीमा किटानी जाहेरी दिएका थिए ।

विस्फोटबाट क्षति पुगेको खपटाले छाएको घर राति नै मर्मत गरिएको थियो । मृतक तथा घाइतेलाई जलाइएको भनिएको इँटाभट्टा घटनाको केही वर्षपछि बन्द भएको थियो । अहिले सो स्थानमा धानखेती छ ।