सिरहामा मेलाको विषयमा कुटाकुट हुँदा १६ घाईते, ९ विराटनगर रिफर !

न्यूज ब्यूरो, सिरहा । सिरहामा मेलाको विषयमा दुई टोलवासीबीच कुटाकुट भएको छ ।

दुईपक्षीय झडपमा सिरहा नगरपालिका १२ सारश्वर गाउँका १६ जना घाइते भएका छन् । घाईते मध्ये केहीको अवस्था गम्भीर देखिएको छ भने केही सामान्य घाईते छन् । घाइतेहरू मध्ये अधिकांशको टाउको र हातमा काटिएको छ । घाईतेमध्ये गम्भीर रहेका ९ जनालाई सिरहामा प्राथमिक उपचारपछि विराटनगर रिफर गरिएको छ । बाँकीको भने सिरहामै उपचार भइरहेको छ ।

मैन र नटवा टोलका युवाहरूबीच दुर्गा मेला हेर्न गएको बेला विवाद भएको थियो । त्यही विषयमा बल्झिएर झगडाको रुपमा लिएको स्थानीयहरूले बताए । उनीहरूका अनुसार छलफलको माध्यमबाट विवाद सल्ट्याउने सहमति भएको थियो । तर, तरकारी बेच्न गइरहेका बिपतिया राईनउपर कुटपिट भएपछि झगडा झन बढेको हो ।

झगडाबारे जानकारी पाएलगत्तै घटनास्थलमा प्रहरी पठाइएको र केहीलाई नियन्त्रणमा समेत लिइएको जिल्ला प्रहरी कार्यालय सिरहाका प्रवक्ता तथा डिएसपी अपिलराज बोहराले जानकारी दिए ।