जनकपुरमा डकैत उपर प्रहरीले चलाए गोली, ४ डकैत पक्राउ !

न्यूज ब्यूरो, जनकपुरधाम । जनकपुरमा आज विहान करिब ३ः३० बजे धनुषा प्रहरीले गोली चलाएर ४ डकैतलाई पक्राउ गर्न सफल भएको छ ।

जनकपुरधााम उपमहानगरपालिका कार्यालयसँगै रहेको जानकी फर्निसिँगमा विहान करिब ३ः३० बजेको डकैतहरुले डकैती गर्न खोज्दा गस्तीमा खटेको प्रहरीले उनीहरुलाई रोक्न खोजेका थिए । डकैतहरुले पेस्तोल देखाएर प्रहरीलाई नै तर्साउन खोज्दा प्रहरीले गोली चलाएर उनीहरुलाई नियन्त्रणमा लिएको हो । जिल्ला प्रहरी कार्यालय धनुषाका अनुसार, भानुचोक र शिवचोकको बीचमा जनकपुरधाम उपमहानगरपालिका वडा नं. २ स्थित रहेको जानकी फर्निसिंङ्ग अगाडी लुटपाट गर्ने गिरोहका ४ जनालाई पक्राउ गर्न सफल भएको हो ।

प्रहरीलाई हतियार देखाएर भाग्न खोज्दा प्रहरीले ३ राउण्ड गोली समेत चलाएको धनुषाका प्रहरी प्रवक्ता एवम् डिएसपी रामेश्वर कार्कीले जानकारी दिए । उनका अनुसार उनीहरुलाई नियन्त्रणमा लिनको लागि प्रहरीले गोली चलाउँदा एक जनाको खुट्टामा गोली लागेको छ र उनको अवस्था भने समान्य रहेको जनाइएको छ । प्रारम्भिक जानकारी अनुसार गोली लाग्नेमा विनोद प्रसाद सिंह नामक व्यक्ति रहेको छ ।

उनीहरुको साथबाट एक थान कटुवा पेस्तोल र २ राउण्ड गोली सहित सटर फोडने औजारहरु समेत बरामद गरिएको हो । प्रवक्ता कार्कीका अनुसार, चारै जनालाई विहान ९ बजे पत्रकार सम्मेलन गरी सार्वजनिक गरिने छ । पत्रकार सम्मेलनमै विस्तृत जानकारी दिने उनले जानकारी दिए । सयममै प्रहरी पुगेपछि उनीहरुले थालेको डकैतीको प्रयास विफल भएको जनाइएको छ ।