प्रहरी र कर्मचारी पार्टीको कार्यकर्ता जस्तो भयो : देउवा

न्यूज ब्यूरो, काठमाडौं । नेपाली कांग्रेसका सभापति शेर बहादुर देउवाले सरकारले प्रहरी र सरकारी कर्मचारीलाई आफ्ना कार्यकर्ता जस्तो बनाएको आरोप लगाएका छन् ।

प्रतिनिधिसभाको चौथो अधिवेशनको अन्तिम दिन सम्बोधन गर्दै देउवाले सरकारले नागरिकको जीउधन र उसको अधिकारको रक्षा गर्नु पर्नेमा राज्य आतंक मच्चाउन खोजेको आरोप लगाएका हुन् । यस्तो कार्य आफूहरुलाई सह्य नहुने पनि उनले चेतावनी दिए ।

उनले देशका विभिन्न भागमा सत्तारुढ दलकै व्यक्तिहरुले नेपाली कांग्रेसका कार्यकर्ता र सामान्य नागरिकमाथि पनि दमन गरिरहेको भन्दै आक्रोश पाखे । सरकारले प्रहरीलाई पनि आफ्नै कार्यकर्ता जस्तो परिचालन गरेको भन्दै सरकारले प्रहरी र कर्मचारीलाई कुनै पनि पार्टीको कार्यकर्ता बनाउनु क्षम्य नहुने बताए ।

प्रहरी नागरिकले नै तिरेको करबाट पालिने भएकाले उसले नागरिकको जीउज्यानको सुरक्षाका लागि लाग्न गम्भीर रहन पनि आग्रह गरे । ‘नागरिकले दिएको करबाट तलब खाने, सुविधा लिने अनि कुनै पार्टीको कार्यकर्ता जस्तो काम गर्ने ?’, देउवाले प्रश्न पनि गरे ।

प्रहरीलाई कुनै पनि पार्टीले तलब नदिएको भन्दै देउवाले प्रहरी कुनै पार्टीको कार्यकर्ता बन्न नहुने र उसको काम समग्र नागरिकको रक्षा गर्ने हुनुपर्ने बताए ।