धनुषाको सतोखरमा बोलबमको रौनक !

न्यूज ब्यूरो, जनकपुरधाम । साउन महिना लाग्ने वित्तिकै तराई मधेशमा बोलबमको लहर चढ्छ । तर, भदौ शुक्ल चतुर्दशीको दिन धनुषाको सबैला, सतोषरमा लाग्ने बोलबम मेलाको बेग्लै आकर्षण देखिन्छ ।

भदौ चढेसँगै सबैलामा यहाँ जताततै बोलबमको चहलपहल बढ्छ । हिन्दू धर्मावलम्बीहरूले यहाँ आएर शिवको पूजा गर्ने गर्छन् । यहाँ हरेक वर्ष बोलबम लाग्दै आएको छ ।

सबैला नगरपालिका वडा नम्बर ९ स्थित पौराणिक कालदेखि नै लाग्दै आएको मेलामा चतुर्दशीको दिन गेरुवस्त्र धारण गरी नदी तथा कुण्डमा गई स्नान गरी त्यहाँबाट ल्याएको जल गाईको दूध, बेलपत्र शिव मन्दिरमा चढाइन्छ ।

कमला नदिबाट जल ल्याएर बोलबम भन्दै यात्रा गर्दाको वातावरण बेग्लै देखिएको छ । हरेक साल बोलबम यात्रा गर्नेहरुको ठूलो भीडले बरमझिया, रघुनाथपुर, बर्कुर्वा, सबैला, गोबिन्दपुर, सतोषरसमेत बोलबमय भएको छ ।

धनुषा जिल्लाकै एक प्रसिद्ध धार्मिक स्थलको रुपमा मानिने सप्तेशवरनाथ महादेव मन्दिर बोलबम यात्रा गर्ने यात्रीहरुको बढ्दो चहलपहलले खास गरेर सबैला र कुशमाहा (सतोखर) मा कावरियाहरुको भिड बढी देखिन्छ । सबैला नगरपालिकामा वर्षेनी बोलबम कार्यक्रमको आयोजना गरिदै आइएको छ । बरमझियास्थित कमला नदीमा कावरियाहरु स्नान गरी जल लिएर आफ्नो बोलबम यात्रा तय गर्छन् ।

बोलबम यात्रामा युवायुवतीको आकर्षण पनि उत्तिकै छ । बोलबम भर्न विभिन्न ठाउँबाट भक्तजन आउने गरेका छन् । पछिल्लोे समय विभिन्न ठाउँहरुबाट बोलबम यात्राका लागि सबैला आउनेक्रम वृद्धि भएको छ ।

चर्को घाममा नांगो खुट्टा भगवान शिवलाई खुशी पार्न श्रद्धालुहरुले शिव मन्दिरमा जल चढाउने गरको बताइन्छ । स्थानीय सबैलाबासिहरुले कावडीयाहरुको स्वागतको लागि आतुर भएर लागेको छ । मेला भर्न आउनेहरुका लागि चिसो पानी तथा निःशुल्क स्वास्थ्य उपचारको व्यवस्थासमेत गरिएको छ ।

बोलबममा भाकाल अनुसार कोहि पैदल त कोहि नाम डन्डवत त कोहि डाक बमको रुपमा सहभागी हने गरेका छन् ।