नेपाली कांग्रेस हिन्दू राज्यको पक्षमा छैन : निधि

न्यूज ब्यूरो, काठमाडौं । नेपाली कांग्रेसका उपसभापति विमलन्द्र निधिले आफ्नो पार्टी देशलाई हिन्दू राज्य नामाकरण गराउने पक्षमा नरहेको बताएका छन् ।

पार्टीका महामन्त्री डा. शशांक कोइरालाले हिन्दू राज्यको पक्षमा वकालत गरिरहेका बेला उपसभापति निधिले भने हिन्दू राज्य नामाकरण गराउने पक्षमा आफ्नो पार्टी नरहेको प्रष्ट पारेका हुन् ।

बिहीबार पार्टी केन्द्रीय कार्यालय सानेपामा आयोजित पत्रकार सम्मेलनमा बोल्दै उनले संविधान निर्माणको नेतृत्वको गरेको आफ्नो पार्टी धर्म निरपेक्ष राज्यको मान्यतालाई स्वीकार गरेर अघि बढिरहेको पनि स्मरण गराए ।

उनले नेपाली कांग्रेसको चार तारे झण्डाको एउटा मान्यता धार्मिक स्वतन्त्रता भएको र धर्म निरपेक्षता पनि त्यसैको परिपूरक भएकाले कांग्रेस त्यही मान्यतामा अडिग रहेको पनि तर्क गरे । उपसभापति निधिले राज्यलाई हिन्दू राज्य नामाकरण गराउने मान्यतामा कांग्रेस नरहेको पटक–पटक दोहोर्याए ।