पञ्जाबमा बम विस्फोट : मृतकको संख्या २३ पुग्यो

न्यूज ब्यूरो, भारत । भारतको पञ्जाबस्थित गुरदासपुरको बटाला क्षेत्रमा भएको बम विस्फोटमा मारिनेको संख्या २३ पुगेको छ ।

गुरदासपुरका डीसी विपुल उज्जवले पटाखा कारखानामा बुधबार दिउँसो करीब ३ः३० बजे भएको विस्फोट घटनामा अहिलेसम्म २३ जनाको मृत्यु भएको पुष्टि भएको छ ।

त्यस्तै, करीब २५ जना अझै भगनावशेषमा फँसिरहेको हुनसक्ने आशंका गरिएको छ । उनीहरुको उद्दार कार्य अहिले पनि जारी रहेको छ । घटनामा २७ जना घाइते रहेको हिन्दुस्तान टाइम्सले जनाएको छ ।

विस्फोट यति शक्तिशाली थियो कि, ५ सय मिटर टाढा रहेको एक मलको शिशा फुटेको छ भने नजिकका घरहरुमा समेत क्षति पुर्याएको छ । स्थानीयका अनुसार बटाला–जलन्धर रोडको हंसली क्षेत्रस्थित पटाखा कारखानामा भएको विस्फोटको आवाज कयौँ किलोमिटरसम्म सुनिएको थियो ।

विस्फोट के कारण भयो भन्ने अझै खुल्न सकेको छैन । पञ्जाबका मुख्यमन्त्री अमरिंदर सिंह र प्रदेश कांग्रेस अध्यक्ष सुनील जाखड आज घटनास्थल पुग्ने जनाइएको छ ।