निजगढमा प्रस्तावित अन्तराष्ट्रिय विमानस्थल त्यहीँ बन्नुपर्छ : राजपा

न्यूज ब्यूरो, जनकपुरधाम । प्रदेश २ को बारा निजगढमा प्रस्तावित अन्तराष्ट्रिय विमानस्थल निर्माणप्रति प्रदेशका मन्त्रीहरु त्यहाँ बनाउन नदिने बताइरहेका बेला राष्ट्रिय जनता पार्टी नेपालले फरक धारणा व्यक्त गरेको छ ।

राजपाको मंगलबार बसेको अध्यक्ष मण्डलको बैठकले विमानस्थल अन्यत्र सार्ने चर्चा चलिरहेकोप्रति ध्यानाकर्षण भएको जनाउँदै त्यहीँ निर्माण गरिनुपर्नेमा प्रतिवद्ध रहेको बताएको हो । प्रदेश २ मा रहेको समाजवादी र राजपाको संयुक्त गठबन्धन सरकारका मन्त्रीहरुले रुख काटेर निजगढमा विमानस्थल निर्माण गर्न नदिने अभिव्यक्ति दिँदै आएका छन् ।

राष्ट्रिय गौरवको योजना रहेको भन्दै राजपाले प्रदेश सरकारसँग आवश्यक समन्वय गर्न, अनावश्यक रुख कटानी नगर्न, वनस्पती एवं वन्यप्राणीको विनाश रोक्न, वन्यजन्तुको विचरण एवं आवागमन पथलाई वाधा पुग्ने लगायत त्यस वनमा निर्भर तल्लो भेगका जनतालाई हुने पानीको समस्या, नदीनालाको विनाश र समग्र पर्यावरणीय प्रभाव मूल्यांकन गरी अन्तराष्ट्रिय विमानस्थलको द्रुत र गम्भीरतापूर्वक कार्य गर्न राजपाले जारी गरेको प्रेस वक्तव्य मार्फत् सरकारलाई ध्यानाकर्षण गराइएको छ ।

राष्ट्रिय गौरवको रुपमा रहेको र बहुचर्चित देशकै दोश्रो ठूलो प्रस्तावित उक्त विमानस्थल निर्माणको काम कुनैपनि बाहाना र कारण देखाएर रोक्न नहुने राजपाको तर्क छ । तर, राजपा–समाजवादी गठबन्धनको प्रदेश २ सरकार भने त्यहाँको रुख काट्न नदिने र प्रदेशभित्रकै अरू खाली जमिनमा विमानस्थल बनाउनुपर्ने पक्षमा छ ।

प्रदेशमा जनघनत्वको तुलनामा वन न्यून रहेको भन्दै वन क्षेत्र ४० प्रतिशत पुर्याउने अभियान घोषणा गरिएकामा रूख काटेर विमानस्थल बनाउँदा अझ घट्ने भएकाले अरु खाली जमिनमा विमानस्थल निर्माण गरिनुपर्ने धारणा प्रदेश सरकारको छ ।