राजपा बैठक विवाद : राजपा समाप्त पार्न बाह्य शक्तिको चाल ?

न्यूज ब्यूरो, काठमाडौं । राष्ट्रिय जनता पार्टी (रापजा) नेपालले राजनीतिक समितिको बैठक बोलाएको छ । पार्टीको नजिकिदो महाधिवेशन, पछिल्लो राजनीतिक अवस्था र पार्टीको आगामी कार्यदिशाबारे छलफल गर्न राजपाले शुक्रबार र शनिवारका लागि राजनीतिक समितिको बैठक बोलाएको हो ।

तर, डाकिएको बैठक नबस्दै पार्टी भित्र विवाद सुरु भएको छ । पार्टीका केही नेताहरु डा. बाबुराम भट्टराई र उपेन्द्र यादव नेतृत्वको समाजवादी पार्टीसँग एकीकरण गर्ने पक्षमा छन् भने केही नेताहरु महाधिवेशन सकाएर प्रकृयागत रुपमा एकीकरण तिर जाने पक्षमा छन् ।

अध्यक्षमण्डलका संयोजक राजकिशोर यादव, अध्यक्षमण्डलका सदस्यहरु महन्थ ठाकुर र अनिल कुमार झा पहिला पार्टीको महाधिवेशन गर्ने, अनि मात्र एकीकरण गर्ने सोचमा छन् ।

तर, समाजवादी पार्टीसँग एकीकरण गर्नुपर्छ भनि अध्यक्षमण्डलका सदस्यहरु राजेन्द्र महतो, महेन्द्र राय यादव र शरतसिंह भण्डारी लागिपरेका छन् । उनीहरु समाजवादी पार्टीका अध्यक्ष उपेन्द्र यादवसँग नियमित छलफल गर्दै आएका छन् ।

राजपा संयोजक यादवले न्यूज ब्यूरोसँग भने, ‘एकीकरण प्रक्रियागत हुनुपर्छ, कुनै पार्टीमा आत्मसमर्पण गरेर हुँदैन, पहिला महाधिवेशन गरेर पार्टीलाई सांगठनिक रुपमा व्यवस्थित गर्ने, अनि मात्र एकीकरण प्रक्रियामा हाम्रो सोच छ । आफ्नै पार्टीको इतिहास र भविष्य चौपट पार्न खोज्नु कदापी राम्रो होईन ।’ राजपाको इतिहास र भविष्य मेट्न नहुने संयोजक यादवको भनाई छ ।

यसै विषयमा पार्टी भित्र र बाहिर अन्योल भएको भन्दै राजपा नेपालका अध्यक्षमण्डलका संयोजक राजकिशोर यादवले पार्टीमा आधिकारिक निर्णय गर्नका लागि राजनीतिक समितिको बैठक बोलाए । तर, प्रष्ट धारणा आओस् भनी बोलाइएको बैठक नै नबसी एक समूहले बैठक प्रभावित पार्न सक्रिय भएका छन् ।

राजपा अध्यक्ष मण्डलका सदस्य राजेन्द्र महतो, महासचिव केशव झालगायतका एक समूह बैठक प्रभावित पार्नेतीर सक्रिय भएका हुन् । यता, बाह्य शक्तिको ईशारामा प्रयोजित ढंगले पार्टीले बोलाएको बैठक प्रभावित गर्न खोजिएको श्रोतको भनाई छ । पार्टीमा विवाद उत्पन्न गराएर अरु पार्टीसँग एकता गराउने र राजपा समाप्त पार्ने कतै (चाई..) को षड्यन्त्र हो की जस्तो लागेको एक नेताले बताए ।

राजपाका एक नेताले भने, ‘राजपामा २१ वटा महासचिव र एक सय ३३ पदाधिकारीहरु छन् । त्यसमध्ये एक नेताले बाह्य शक्तिको इशारामा प्रायोजित ढंगले खैलाबैला मच्याउन खोजिरहेका छन्, यो कुरा पार्टीको मर्यादा र हित विपरित हो ।’

पार्टीको मयार्दा, निति विपरित बाहिर सार्वजनिक रुपमा पार्टीको संयोजकले बोलाएको बैठकलाई प्रश्न उठाउनु जायज नभएको उनले बताए । उनले भने, ‘जे कुरा गर्ने हो, पार्टीको बैठकमा राख्न सकिन्छ, उहाँ बाहिर कसरी यस्तो बोल्नुभयो त्यसको जवाफ भोलि दिनुपर्छ ।’

यता, राजपा अध्यक्ष मण्डलका सदस्य अनिलकुमार झाले पार्टीको हितविपरित अभिव्यक्ति दिएका राजपा नेपालका महासचिव केशव झालाई कारवाही गर्ने बताएका छन् । अध्यक्षमण्डलका सदस्य अनिलकुमार झाले केशव झाको नाम नलिई पार्टीको हितविपरित बोल्ने जो कोहीलाई पार्टीले कारवाही गर्ने प्रतिक्रिया दिएका हुन् ।

झाले भने, ‘बैठक बोलाउने जिम्मेवारी अध्यक्षमण्डलको हो, आवश्यकता परेमा बैठक बोलाउन सक्छ, तर बैठक बस्दै नबसी त्यसको विरोध गर्नु गैर जिम्मेवारी कार्य हो, यसको बारेमा पार्टी सोच्न बाध्य हुनेछ ।’