मेयर गोईतको एजेन्डा पूरा, कमला नपाको हरेक वडामा विजुली

न्यूज ब्यूरो, जनकपुरधाम । मेयर बने लगत्तै नगरपालिकाभरि विजुली ल्याउने एजेन्डालाई नगर प्रमुख राम उदगार गोईतले पूरा गरेका छन् ।

पूर्वी धनुषाको अति पिछडीएको वडाहरुमा अहिलेसम्म विजुली नगएको अवस्थामा मेयर गोईतको पहलमा विजुली ल्याइएको हो । नगरपालिकाको केही वडामा विजुली गएपनि कैयौं वडाका वासिन्दा अहिले पनि टुकीको भरमा जीवनयापन गर्दै आएको थियो । शुक्रबार एक कार्यक्रमबीच कमला नगरपालिका वडा नं. ५ लक्कडमा विजुलीको स्वीच अन गरी उदघाटन गरेका हुन् । यससँगै नगरपालिकाको हरेक वडामा विजुलीको पहुँच भएको छ ।

मेयर गोईतको अथक प्रयासपछि जिल्लाको हुम्ला जुम्ला जस्तै विकट मानिने कमला नगरपालिको कमला नदी छेउको गाउँहरुमा विजुली नहुँदा आम सर्वसाधारण विभिन्न सुविधाबाट बञ्चित भएको अवस्थामा मेयर गोईतको प्रयासले बत्ति बलेका छन् । शुक्रबार उनले वडा नं. ७ मा नगरकी उपप्रमुख शिला देवी मण्डलसँगै सँयुक्त रुपमा विजुली प्रसारणको उदघाटन गरेका हुन् ।

विजुलीको अभावमा मट्टितेलमा टुकी बालेर बस्नुपर्ने अवस्था कमला नगरपालिकाको कमला नदी छेउछाउका गाउँहरुमा थियो । कुनै आपत्तकालिन अवस्थामा पनि झनै जटिल हुने अवस्थामा रहेको बेला विजुली आउँदा वडावासी खुसी देखिएका छन् । विजुली उदघाटन गर्दै मेयर गोईतले विजुलीको चुहाबट भन्दा पनि उचीत समय र अनुकुल मिलाएर प्रयोग एवम् उपभोग गर्न सल्लाह दिए ।

विजुलीको लागि अथक एवम् सराहनीय प्रयास गरेको भन्दै स्थानीयवासीहरुले मेयर गोईतलाई प्रशंसा सहित बधाई दिएका थिए । सो क्रममा मेयर गोईतले आफू निर्वाचित भएको बेला नै कमला नगरपालिकाको प्रथम एजेन्डा बिजुली आपूर्ति रहेको बताएका थिए । नगरपालिकाको भौगोलिक संरचना र विभिन्न बाधा अवरोधका कारण ढिलाई भएको भन्दै उनले अन्तत आफ्नो पूर्व घोषित एजेन्डा पूरा गरेको भन्दै खुसी व्यक्त गरे ।

सो उदघाटन कार्यक्रममा वडा नं. ५ का वडाध्यक्ष, बुद्धिजीवी, स्थानीयवासी, भद्रभलादमी, अधिकारकर्मी तथा विभिन्न दलका राजनीतिक पार्टीका नेता तथा कार्यकर्ताहरुको उपस्थिति रहेको मेयर निकट मनोहर ठाकुर (भरत) ले जानकारी दिए ।