प्रभू साहको राजीनामा फिर्ता हुने

न्यूज ब्यूरो, जनकपुरधाम । प्रदेश २ को नेकपा अध्यक्ष पदबाट राजीनामा दिएका प्रभु साहको राजीनामा स्वीकृत नहुने भएको छ ।

पार्टीको माथिल्लो निकायको निरन्तर गलत निर्णय र निर्देशनका कारणले काम गर्ने वातावरण नभएको भन्दै मंगलबार राजीनामा दिएका साहलाई पार्टीले मनाएर राजीनामा फिर्ता गर्न लगाउने भएको हो ।

नेकपा प्रवक्ता नारायणकाजी श्रेष्ठले बताए अनुसार, साहले उठाएको कतिपय कुरामा पार्टी गम्भीर रहेको र यसविषयमा साहसँग कुराकानी गर्ने र सम्झाईबुझाई गर्ने पार्टीको तयारी छ । गत मंगलबार पार्टी अध्यक्ष पुष्पकमल दाहाल ‘प्रचण्ड’ लाई भेटेर नेपाल कम्युनिस्ट पार्टी (नेकपा) प्रदेश नम्बर दुईको अध्यक्ष पदबाट साहले राजीनामा दिएका थिए ।

प्रदेश अध्यक्षको रुपमा आफूले अगाडि बढाएका हरेक कार्यमा पार्टीको नेतृत्व तहबाट नै असहयोग तथा चौतर्फी घेराबन्दीमा परेको भन्दै उनले राजीनामा बुझाएका थिए । स्थायी कमिटीका प्रबल दावेदार मानिएका साहको नाम कमिटीमा नपरेपछि उनी असन्तुष्ट बनेका थिए ।

प्रदेश कमिटी सदस्यहरुको चयनदेखि पछिल्लो समय जिल्ला कमिटीको पदाधिकारी चयन गर्दा प्रदेश कमिटीलाई अपठ्यारो पार्न खोजिएको साहको बुझाई छ ।