डोजरले घर भत्काइएपछि विच्चलीमा शेख परिवार !

न्यूज ब्यूरो, महोत्तरी । महोत्तरीमा अदालतको आदेश भन्दै एकको घर भत्काइएको छ । जिल्ला अदालत महोत्तरीको आदेशमा भंगहा नगरपालिका वडा नं. १ निवासी मदन शेषको कच्ची घर प्रहरी अदालतका कर्मचारी तथा स्थानियहरुको रोहवरमा डोजरले भत्काइएको हो ।

घर भत्काइएपछि हाल साउदीमा वैदेशिक रोजगारीमा रहेका शेषको परिवार घरवार विहिन भएका छन । उनका घरमा श्रीमति जाहिरा खातुन र चार छोरा छोरी घरबार विहिन भएका हुन । केहि वर्ष पहिले विदेश जान भनि स्थानिय साहु तथा शेषलाई वैदेशिक रोजगारीमा पठाउने एजेन्ट बदरी ठाकुरसंग २० हजार कर्जा लिएकोमा मदन शेषका बुवाले ८५ हजारको तमसुक बनाई दिएपछि सोहि कागजलाई अदालतले आधार मान्दै अदालतमा पिडित देखिएका बदरी ठाकुरलाई क्षतिपुर्ति असुल उपर गरिदेउ भनेर दिएको आदेशको आधारमा शेषको घर भत्काइएको हो ।

शेष कि श्रीमति जाहिरा खातुनले ठाकुरले आफुमाथी कुदृष्टी राखेकोमा उसको ईच्छा पुरा हुन नसकेको र पटक पटक गाउमै पंचायती बसाई आफुहरुमाथी दया गर्न गरिएको अनुरोधबाट झनै रुष्ट भई प्रहरीकै संलग्नतामा आफ्नो घर ठाकुरले भत्काई दिएको बताईन । श्रीमानलाई विदेश पठाईदिन्छु भनि चार पाच वर्ष पासपोर्ट बनाएर गाउमै बसाएको र पछि कागज बनाईदिदाको केहि समय पछाडी विदेश पठाईदिएपछि भनेको काममा नपठाईदिदा श्रीमानले रकम तिर्न नसकेको जाहिराको भनाई छ ।

उनी पैसाको बलमा प्रहरीलाई समेत मिलाएर बल पुर्वक आफ्नो घर तोर्न लगाएको आरोप लगाएकि छिन । घर तोर्न लाग्दा प्रहरीले समेत यातना दिएको उनको आरोप छ । २० हजारको कर्जामा लाखौ उसुल गर्ने र आफ्नो अस्मितासंग पनि खेलवाड गर्न मनसाय राखेका ठाकुरको मनोकांक्षा पुर्ण नभएपछि आफु गरिबमाथी यस्तो अन्याय भएको उनको भनाई छ ।

यता विदेश जान नभई घरायशी कामको लागि शेष परिवारले आफुसंग कागज गरेर पैसा लिएपनि पैसा नतिरेपछि आफु कानुनको सरणमा गएको र शेष परिवारले भनेजस्तो कुनै कुरा नरहेको बदरी ठाकुरले संचारकर्मीलाई बताएका छन ।