जनकपुरबाट स्कोलरसीपको परीक्षा दिने ४ परीक्षार्थी पक्राउ  !

न्यूज ब्यूरो, जनकपुरधाम । सिटिईभिटी अन्तर्गतको डिप्लोमाको लागि स्कोलरसीप (छात्रवृति) मा परीक्षा दिने क्रममा जनकपुरबाट ४ जना परीक्षार्थीलाई प्रहरीले पक्राउ गरेको छ ।

शनिबार विहान ७ बजेदेखि ८ः३० बजेसम्म भएको परीक्षाको क्रममा जनकपुरधामको सकल भवन कन्या माविमा परेको परीक्षा केन्द्रभित्र मोबाईल लिएर गएपछि उनीहरुलाई पक्राउ गरिएको धनुषा प्रहरीका प्रहरी प्रवक्ता एवम् डिएसपी रामेश्वर कार्कीले जानकारी दिए । परीक्षा केन्द्रभित्र मोबाईल पूर्णरुपमा प्रतिबन्ध गरिएपनि उनीहरु मोबाईल लिएर भित्र छिरेको भन्दै पक्राउ गरिएको जानकारी उनले दिए ।

पक्राउ पर्नेहरुमा प्रदेश नं. २ को ४ जिल्लाका ४ परीक्षार्थीहरु रहेका छन् । ३ छात्रा सहित एक छात्र रहेको प्रहरीले जनाएको छ । पक्राउ पर्नेहरुमा सर्लाही जिल्लाकी रिँकी यादव, धनुषाबाट रुवी कुमारी यादव, रौतहटबाट सकुन्तला साह र सप्तरीका रामानन्द यादव रहेको प्रहरीले जनाएको छ ।

छात्रवृतिको परीक्षामा चोरी गर्ने उदेश्यले मोबाईल चोरेर भित्र छिराएको भन्दै उनीहरुलाई पक्राउ गरिएको जनाउँदै अहिले आवश्यक अनुसन्धानको लागि जिल्ला प्रहरी कार्यालय धनुषामा राखिएको जानकारी उनले दिए । उनले भने, - "अस्ती एईईमा मोबाईलकै कारण कत्रो तनाव भएको थियो, सेन्टरमा मोबाईल पूर्ण प्रतिबन्ध रहेको अवस्थामा यीनीहरु मोबाईल भित्र कसरी छिरायो भनेर अनुसन्धान सुरु गरेका छौं । अब कारवाहीको लागि के गर्ने भनेर सिटिईभिटीले गर्नेछ । हामी अनुसन्धानमा छौं , चारै जनालाई अहिले जिल्ला प्रहरी कार्यालय धनुषामा राखिएको छ ।"

यता, धनुषाका सहायक प्रमुख जिल्ला अधिकारीले पक्राउ परेको घटनालाई पुष्टि गर्दै कारवाही के कस्तो गरिने भनेर दिउँसो २ बजेपछि मात्र जानकारी दिन सकिने बताए । सिटिईभिटी जनकपुरका प्रमुख नागेन्द्र साहले परीक्षार्थी पक्राउ गरिएको बारेमा आफूलाई केही जानकारी नभएको जनाउँदै केन्द्रबाट के कस्तो निर्देशिका छ त्यही अनुरुप कारवाही गरिने प्रतिक्रिया दिए ।

सिटिईभिटीका परीक्षा नियन्त्रक शिव हरी ढकालसँग प्रतिक्रिया लिँद उनले कारवाहीको लागि सम्बन्धित जिल्लाको प्रमुख जिल्ला अधिकारीले पहल थाल्ने प्रतिक्रिया दिए ।