जनकपुर दुर्घटना : थप १ को मृत्यू, मृतको सँख्या ४ पुग्यो !

न्यूज ब्यूरो, जनकपुरधाम । आईतबार अपरान्ह भएको सवारी दुर्घटना परी मृत्यू हुनेको सँख्या ४ पुगेको छ ।

जनकपुरधाम- महेन्द्रनगर सडकखण्ड अन्तर्गत क्षीरेश्वरनाथ नगरपालिका वडा नं. ४ स्थित भएको वीँगर र अटो रिक्सा दुर्घटनामा परी दुई जनाको घटनास्थलमै मृत्यू भएको थियो भने दुई जनाको उपचारको क्रममा मृत्यू भएको हो । जनकपुर महेन्द्रनगर सडकखण्डमा आईतबार अपरान्ह करिब ५ः३० बजे विंगर र टेम्पो एक आपसमा ठोक्किदा दुई जनाको घटनास्थलमै मृत्यू भएको थियो भने गम्भिर चोट लागेर उपचार गराउन क्षीरेश्वरनाथ नगरपालिका वडा नं. १० स्थित रमदैया भवाडी स्थित रहेको जानकी मेडिकल कलेजमा उपचारको क्रममा मृत्यू भएको थियो ।

जानकी मेडिकल कलेजमा उपचारको क्रममा मृत्यू हुनेमा टेम्पो चालक अन्दाजी बर्ष २५ का रोशन साह रहेको ईलाका प्रहरी कार्यालय महेन्द्रनगरका प्रहरी नीरिक्षक अमिर दाहाले जानकारी दिए । दाहालका अनुसार, विराटनगरमा उपचाररत धनुषाको हँसपुर नगरपालिकाको मलहनिया बस्ने सँजय साहको उपचारको क्रममा मृत्यू भएको हो । उनको विराटनगर स्थित अस्पतालमा उपचारको क्रममा सोमबार बेलुको मृत्यू भएको ईन्सपेक्टर दाहालले न्यूज ब्यूरोलाई बताए ।

यता, विँगर चालक फरार रहेकोमा विशेष सुराकीको आधारमा उनलाई सोमबार पक्राउ गरिएको जनाइएको छ ।

महेन्द्रनगरबाट जनकपुर तर्फ आउँदै गरेको ना १ ज ७०२२ नम्बरको विँगर र जनकपुरबाट महेन्द्रनगर तर्फ जाँदै गरेको ज १ ह ४८९६ नम्बरको टेम्पो क्षीरेश्वरनाथ नगरपालिका वडा नं. ४ हरैया नजिक एक आसपमा ठोक्किदा दुर्घटना हुन पुगेको प्रहरीले जनाएको छ । दुवै तर्फबाट सवारी तीव्र गतिमा रहेको कारण दुर्घटना हुँदा टेम्पो क्षतविक्षत भएको थियो ।

धनुषाको रमेशपुर बस्ने अन्दाजी बर्ष ७२ का रामदेव साह तथा सिरहाको इनरबा बस्ने अन्दाजी बर्ष ५० की रेखा यादवको घटनास्थलमै मृत्यू भएको थियो भने सोही घटनामा टाउकोमा गम्भिर चोट लागेर उपचारको लागि अस्पतालमा रहेका टेम्पो चालक साहको आईतबारै साँझ करिब ६ः४५ बजेको समयमा मृत्यू भएको थियो । सँजय साहको भने सोमबार बेलुका उपचारको क्रममा मृत्यू भएपछि त्यस दुर्घटनामा मृत्यू हुनेको सँख्या ४ पुगेको हो ।