मालपोत कार्यालय सिरहामा अख्तियारको छापा, २ पक्राउ, कार्यालय प्रमुख टाप !

न्यूज ब्यूरो, सिरहा । मालपोत कार्यालय सिरहामा अख्तियारको टोलीले छापा हानेको छ । विशेष सूचनाको आधारमा पुगेका अख्तियारको टोलीद्धारा दुई फन्दामा परेका छन् ।

अख्तियार दुरुपयोग अनुसन्धान आयोगको कार्यालय बर्दीवासको टोलीले आज (सोमबार) दिउँसो १ बजेको समयमा मालपोतका एक नायब सुब्बालाई पाँच हजार नगद घुससहित रंगेहात पक्राउ गरेको हो भने मालपोतमा लेखापढीको काम गर्ने एक व्यक्तिलाई समेत पक्राउ गरिएको हो ।

पक्राउ पर्नेमा सिरहा मालपोत कार्यालयमा कार्यरत ५० वर्षीय नायब सुब्बा मिथिलेश्वर ठाकुर र सिरहाको बरियारपट्टी गाउँपालिका–३ का लेखापढी व्यवसायी ४२ वर्षीय राजवंशी चौधरी रहेका छन् ।

यता, अख्तियारको टोली मालपोत पुगेको जानकारी पाएलगत्तै कार्यालय प्रमुख रामबाबु मण्डल पक्राउ पर्ने डरले कार्यालय छोडेरै भागेका छन् ।

पक्राउ परेका दुबैजना माथि थप अनुसन्धान भइरहेको अख्तियार दुरुपयोग अनुसन्धान आयोगको कार्यालय बर्दीवासले जनाएको छ । मालपोत कार्यालय सिरहा, नापी कार्यालय लगायतका सरकारी कार्यालयहरुमा खुल्लेआम घुस लेनदेन हुँदै आएको बाहिरिएपछि अख्तियारले निगरानी बढाएको हो ।