मधेश सशस्त्र आन्दोलन १६ वर्षमा : गोईतले भने, 'बन्दुकले स्वतन्त्र तराईलाई मुक्त गराउँछौं'

न्यूज ब्यूरो, जनकपुरधाम । मधेशमा जारी सशस्त्र आन्दोलनले १५ वर्ष पूरा गरी १६ वर्षमा प्रवेश गरेको छ । स्वतन्त्र मधेशको लक्ष्यसहित जयकृष्ण गोईतको नेतृत्वमा २०६१ साउन १० गतेबाट सुरु भएको सशस्त्र आन्दोलनले आज (शुक्रबार) १५ वर्ष पूरा गरेको हो ।

सशस्त्र भूमिगत संगठन ‘जनतान्त्रिक तराई मुक्ति मोर्चा (क्रान्तिकारी)’ का अध्यक्ष गोईतले शुक्रबार एक विज्ञप्ति जारी गर्दै सशस्त्र आन्दोलन १६ वर्षमा प्रवेश गरेको जनाएको छ । अध्यक्ष गोईतले जारी गरेको विज्ञप्तिमा स्वतन्त्र तराईलाई पूर्णतः अनाधिकृत र अवैध नेपाली शासन सत्ताबाट मुक्तिको लागि बालिएको सशस्त्र क्रान्तिको मशाल अहिलेसम्म प्रज्वलित रहेको र यसको निभ्ने कुनै खतरा नरहेको उल्लेख गरिएको छ ।

गोईतले विज्ञप्तिमा ‘बन्दुकको भरमा टिकेको नेपाली राज्य सत्तालाई बन्दुकबाट नै ध्वस्त परेर स्वतन्त्र तराईलाई मुक्त गर्ने सुनिश्चित छ’ भनेर समेत उल्लेख गरेका छन् । जनतान्त्रिक तराई मुक्ति मोर्चा (क्रान्तिकारी) १५ वर्ष पूरा गरी १६ वर्षमा प्रवेश गरेको अवसरमा आन्दोलनमा शहादत प्राप्त गरेका सम्पूर्ण सहिदहरुप्रति श्रद्धाञ्जली व्यक्त गर्दै स्वतन्त्र तराई अवैध नेपाली शासन सत्ताबाट मुक्त नहुँञ्जेलसम्म लड्दै रहने गोईतले विज्ञप्ति मार्फत् जनाएका छन् ।

तत्कालिन नेकपा (माओवादी) बाट छुट्टिएर सशस्त्र आन्दोलन गरी ‘स्वतन्त्र मधेश’ स्थापना गर्ने लक्ष्य लिएर गोईतले मोर्चा गठन गरी आन्दोलन सुरु गरेका थिए ।

गोईतले मोर्चा बनाएर आफ्नो गतिविधि बढाएपछि मधेशमा दर्जनौं भूमिगत सशस्त्र समूहहरु निर्माण भए । विभिन्न समयमा भएको मधेश आन्दोलनमा समेत सघाएका सशस्त्र समूहका नेताहरुको मधेशवादी दलहरु सत्तामा आउने वितिकै राज्यबाट हत्या भयो ।

त्यसै अवधिमा मधेशमा करिब सयजना युवाहरु गैरन्यायिक तरिकाले मारिए । कयौं सशस्त्र समूहका नेताहरुको हत्या भएपछि त्यसबेला खुलेका दर्जनौं समूह मध्ये हाल गोईत नेतृत्वको जनतान्त्रिक तराई मुक्ति मोचा (क्रान्तिकारी) मात्र सक्रिय छन् ।