समाजवादीको प्रदेश सचीवमा 'यादव'

न्यूज ब्यूरो, जनकपुरधाम । समाजवादी पार्टी नेपालको प्रदेश नं. २ को सचीवमा दिनेश कुमार यादवलाई पनि चयन गरिएको छ ।

तत्कालिन संघीय समाजवादी फोरम नेपाल र नयाँ शक्तिबीच एकीकरण भएको झण्डै अढाई महिनापछि प्रदेश २ मा दुबै पार्टीका नेता÷कार्यकर्ता समायोजनमा बुधबार यादवलाई प्रादेशिक सचीवमा चयन गरिएको हो । गत बैशाख २३ गते यी दुबै पार्टीबीच एकीकरण भई समाजवादी पार्टी नामांकरण गरिएपश्चात भएको समायोजनमा यादवलाई पनि सचिवमा चयन गरिएको हो ।

दुई कार्यकालसम्म सप्तरीको तत्कालिन संघीय समाजवादी फोरमको जिल्ला अध्यक्ष रहिसकेका यादव राजनीतिक क्षेत्रको पक्कडमा भने बलवान मानिएको छ । बुधबार जनकपुरमा सम्पन्न पार्टी समायोजन कार्यक्रममा सचिवको लागि पद तथा गोपनीयताको सपथ यादवले खाएका छन् । ईश्वरको नाममा सपथ लिंदै सचिव यादवले नेता, कार्यकर्ता जनताप्रति पूर्ण वफादार र इमान्दार भई पदीय जिम्मेवारी निर्वाह गर्ने बताए ।

विजय यादव अध्यक्ष रहेको प्रदेश समितिको उपाध्यक्षमा तीन जनालाई राखिएको छ । रामपृत पासवान, उर्मिला साह, सुशिल यादव उपाध्यक्ष बनेका छन् भने मुख्य सचिवमा शम्भू झा, सचिवहरुमा दिनेश यादव सहित ज्ञानेन्द्र कुमार यादव र राम कैलाश यादवलाई चयन गरिएको छ । कोषाध्यक्षमा सिरहाकी रेणु यादवलाई चयन गरिएको छ । ११ पदाधिकारी सहितको ९९ सदस्यीय समितिमा २ उपाध्यक्ष सहित २९ सदस्यको पद खाली राखिएको छ । प्रदेशका पदाधिकारी र सदस्यहरुलाई केन्द्रीय समिति अध्यक्ष उपेन्द्र यादवले बुधबार नै शपथ ग्रहण गराएका छन् ।

एकीकरण पश्चात बुधबार प्रदेश २ को राजधानी जनकपुरधाममा आयोजित एक कार्यक्रमकाबीच समायोजन घोषणा गरिएको छ । समायोजन गर्न पार्टीका उपाध्यक्ष एवं प्रदेश २ का मुख्यमन्त्री लालबाबु राउतको संयोजकत्वमा एक कार्यदल बनाइएको थियो । कार्यदलका संयोजक राउतले नै समायोजन भएर बनेका समाजवाी पार्टीको नयाँ कार्यसमितिको नाम घोषणा गरेका थिए ।