रौतहटमा भारी वर्षा : नदीहरुमा जलस्तर बढ्दै, सतर्क रहन आग्रह !

न्यूज ब्यूरो, रौतहट । लगातारको अविरल वर्षाका कारण बागमती र लालबकैया नदीमा पानीको सतह बढ्दै गएको छ ।

पानीको सतह बढ्दै गएपछि बागमती र लालबकैया नदी आसपासका बासिन्दालाई सतर्कता अपनाउन बाढी मापन केन्द्र कर्मैयाले आग्रह गरेको छ । बागमती नदीमा आएको बाढीले दुईबटा रौतहटमा दुईबटा बाँध समेत भत्काएपछि उच्च सतर्कता अपनाउन आग्रह गरिएको हो ।

बाढीले रौतहट जिल्लाका राजदेवी नगरपालिकाको ब्रम्हपुरी र गढिमाई नगरपालिका ३ स्थित लक्ष्मीपुर नजिकैको बाँध टुटेको जनाइएको छ । करिब दुई साताअघि परेको अविरल वर्षा र त्यसपछि लालबकैया नदीमा आएको बाढीका कारण बैरगनिया सितलपुर, हर्षाहा, घुसुकपुर, कटहरिया, बुनियाद, लक्ष्मीनिया, लक्ष्मीपुर, परोहा, राजपुर, देवाही, बन्जरहा लगायतको ठाउँमा बाँध भत्केको थियो ।

रौतहट जिल्लको चाँदी, झाँझ नदीमा समेत ठूलो बाढी आएको छ । यस नदीको बाढी बस्तीमा पस्ने खतरा रहेको बताइएको छ । रौतहटमा राति देखि नै निरन्तर रुपमा पानी परिरहेको छ । फेरी पानी पर्न थालेपछि यसअघिका बाढी पीडितहरुको बिजोग भएको छ ।

रौतहटका हजारौं हजार बाढी पीडितहरु पालमुनी र सर्वजानिक स्थान तथा विद्यालयमा समेत शरण लिएर बसेका छन् । बाढी मापन केन्द्र कर्मैयाले बागमती, लालबैकैया र चाँदी नदीमा कुनैबेला पनि ठूलो बाढी आउन सक्ने भन्दै बुधबार साँझसम्म सतर्क रहेर बस्न आग्रह गरेको छ ।