प्रहरीले उद्धार गर्न नसकेका ३ जनाको जनमत पार्टीको रेस्क्यू टिमद्धारा जिवितै उद्धार

न्यूज ब्यूरो, सिरहा । डा. सिके राउत नेतृत्वको जनमत पार्टीको रेस्क्यू टिम बाढी पहिरोको विपत्तिमा उद्धार कार्यमा सक्रिय भएका छन् ।

लगातारको अविरल वर्षापछि आएको बाढी पहिरोमा फसेकाहरुको उद्धार गर्न जनमत पार्टीको रेस्क्यू टोली सक्रिय देखिएका हुन् ।

रेस्क्यू टोलीले शनिबार कमला नदिको बाढिमा फसेका ३ जना व्यक्तिलाई जिवितै उद्धार गरेको छ । शनिबार बिहान ६ बजे देखि नै कमला नदिको छेउमा फसेका सिरहाको कल्याणपुर नगरपालिका वडा नं. २ ईटारी प्रसाहीका लालबाबु मण्डलसहित २ जना महिलालाई जिवितै उद्धार गरिएको हो ।

कमलामै रहेको अवस्थामा अचानक बाढी आएपछि उनीहरु त्यहीँ रुखमा चढेर ज्यान जोगाएका थिए । उनीहरूको उद्धारका लागि प्रहरीको टोली गएपनि उद्धार सामाग्री र थप टोली बिना सम्भव नभएको भन्दै फिर्ता भएपछि जनमत पार्टीको रेस्क्यू टोलीले उनीहरूलाई जिवितै उद्धार गरेको हो ।

तीनजना फसेको थाहा पाएलगत्तै कमला घाट पुगेका जनमतको रेस्क्यू टोलीले स्थानीय युवाहरूको सहयोगमा उनीहरूको उद्धार गरेको जनाएको छ । प्रहरी फिर्ता भएपछि अन्तिम अवस्थामा रहेका उनीहरूको समयमै पुगेपछि ज्यान जोगाउन सफल भएको जनमतका बलराम सेवकले जानकारी दिए ।

जनमत पार्टीका अध्यक्ष डा. राउतले शनिबारै प्रेस विज्ञप्ति जारी गर्दै उद्धार तथा राहत कार्यमा जुट्न आफ्ना नेता तथा कार्यकर्ताहरुलाई आह्वान गरेका थिए ।

निरन्तर परेको अविरल वर्षाका कारण तराई मधेशको विभिन्न नदीहरुमा पानीको उच्च बहाब भएको छ भने आसपासका बस्तीहरु डुवानमा परेको छ ।