कमलाको बीचमै फसेका ९ जनाको उद्धार गर्न हेलिकप्टर आउँदै !

न्यूज ब्यूरो, सिरहा । धनुषा र सिरहाको सिमामा रहेको कमला नदीमा ९ जना फसेका छन् ।

सिरहाको सिरहा नगरपालिका–६ स्थित बसपिट्टा घाटमा निर्माणाधिन धनुषा र सिरहा जोड्ने कमल पूलका ९ प्राविधिक तथा कामदार बीचमै फसेका छन् ।

पूलको काम गर्न गएका बेला अचानक बाढी आएपछि उनीहरु हिजो नै त्यही फसेको बताइएको छ । हिजो दिनमै बाढीमा फसेका उनीहरु हारगुहार लगाएपछि हिजो राति मात्र जानकारी आएको सिरहाका प्रमुख जिल्ला अधिकारी गोपाल प्रसाद अधिकारीले जानकारी दिए ।

पूलको काम गरिरहेको अवस्थामै अचानक बाढी आउँदा उनीहरु त्यही ज्यान जोगाएर बसेका छन् । बीचमै फसेका सबैजना त्यहाँबाट हारगुहार मागिरहेको छ ।

यता, जिल्ला प्रहरी कार्यालय सिरहाले उद्घारको लागि पहल थालिएपनि उद्धारमा समस्या भएको जनाएको छ । उद्धार गर्न टोली पठाइएपनि पानीको बहाब उच्च भएका कारण उद्धार हुन नसकेको जनाएको हो ।

बाढीको जलस्तर झन् बढिरहँदा उद्धारमा कठिनाई भएपछि उनको उद्धारको लागि हेलिकप्टर मगाइने भएको छ । उद्धार गर्ने टोली परिचालन गरिएपनि नदीमा अत्यधिक बाढी रहेका कारण समस्या भएपछि उद्धारका लागि हेलिकप्टर आइरहेको प्रजिअ अधिकारीले जानकारी दिए ।

उद्धार टोलीसहित काठमाडौंबाट हेलिकप्टर उडिसकेको जानकारी प्राप्त भएको छ भने मौसम खराबीका कारण सिरहा आउन समय कति लाग्ने भन्नेबारे भन्न नसकिने प्रजिअ अधिकारीले बताए ।

उनले न्यूज ब्यूरोसँग भने, ‘उद्धारको लागि रातिदेखि नै हरेक प्रयास भइरहेपनि बाढीको सतह उच्च रहेका कारण उद्धार हुन सकिरहेको छैन । उद्धार टोलीबाट उद्धार हुन नसकेपछि विहानैदखि हेलिकप्टर मगाउँने प्रयासमा छौं, तर मौसम खराबीका कारण आउन सकिरहेको छैन । अहिले त्यहाँबाट उडेको छ, तर मौसम खराब छ, सक्छ–सक्दैन, हेरौं ।’

हेलिकप्टर पठाउने प्रयास विहानैदेखि भएपनि मौसम खराबीका कारण ढिलो भएको प्रजिअ अधिकारीले जनाए ।