धनुषामा ३ दर्जन बढी घर डुबानमा, लाखौंको क्षति

न्यूज ब्यूरो । बुधबारदेखि निरन्तर रुपमा परेको अबिरल बर्षाका कारण धनुषाको विभिन्न ठाउँमा घर डुबानमा परेको छ ।

अबिरल बर्षाका कारण धनुषाको धनुषाधाम नगरपालिका र मिथिला बिहारी नगरपालिकाको विभिन्न वडामा स्थानीयहरुको घर डुबानमा परेको जिल्ला प्रहरी कार्यालय धनुषाले जनाएको छ । प्रहरीका अनुसार धनुषाधाम नगरपालिका वडा नं. ५ को नौसय विघाको उत्तरबारी टोल र वडा नं. २ को धरमपुरमा एक दर्जनबढी घर डुबानमा परेको हो ।

यसका साथै, धनुषाकै मिथिलाबिहारी नगरपालिकाको भूतही पटेर्वामा समेत दुई दर्जन बढी घर डुबानमा परेको हो । ईलाका प्रहरी कार्यालय धनुषाधामका प्रहरी नीरिक्षक राम कुमार यादवले दिएको जानकारी अनुसार भूतही पटेर्वाको दास टोलमा दुई दर्जन बढी स्थानीयको घर डुबानमा परेको हो ।

घरमा पानी पसेको छ भने उनीहरुलाई सुरक्षित ठाउँमा वासको व्यवस्था गर्न पहल थालिएको बताइएको छ । उनीहरुलाई उचीत बासको लागि मिथिला बिहारी नगरपालिकाबाट पहल भएको नभएको बारे नगर प्रमुख अनिल यादवले विभिन्न ठाउँमा प्रभावित क्षेत्रमा जेसिबी सहित अन्य सहयोग पठाइएको जनाए ।

यसका साथै, धनुषाको क्षीरेश्वरनाथ नगरपालिकाको विभिन्न वडामा समेत घरमा पानी पसेको प्रहरीले जनाएको छ । क्षीरेश्वरनाथ नगरपालिका वडा नं. ५ महेन्द्रनगर स्थित नाला जाम नभएर नालाको पानी नै निकास हुन नपाउँदा दुधमति चौक, आदर्श टोल, उचाई टोल, सिन्धुली टोल, सखुवा बजार टोल एरिया लगायतका ठाउंमा स्थानीयहरुको घरमा पानी पसेको हो ।

धनुषाधामको नौयस विघा टोलमा जेसिबीको सहायतामा बाटो र कलभर्ट हटाएर पानीको निकास दिएको वडा नं. ५ का वडाध्यक्ष ईन्द्र कुमार महतोले जनाए । उनले भने, हामी स्थानीय स्तरमै गएर क्षतिको नीरिक्षण गर्दै आवश्यक सहयोगको लागि पहल थालेका छौं ।

नगरपालिकाको विपद व्यवस्थापन समितिले आफ्नो कार्य थालेको बताइएको छ । अबिरल बर्षाका कारण जनजीवन प्रभावित भएको छ ।